भांगरभूंय | प्रतिनिधी
गोंय विद्यापीठांत आयज मंगळार 16 आनी बुधवार 17 डिसेंबर हे दोन दीस चवथें युवा कोंकणी कथा संमेलन जाता. कोंकणींतल्या युवा साहित्यिकांनी मुजरत ह्या संमेलनाक हाजीर रावचें.
कोंकणी सरस्पत मंडळ आयोजीत चवथें युवा कोंकणी कथा संमेलन गोंय विद्यापिठांत मंगळार 16 आनी बुधवार 17 डिसेंबर हे दोन दीस आयोजीत केलां. कोंकणी चळवळीक युवकांचो सातत्यान सहभाग मेळचो देखून गोंयांत युवकांची कला, साहित्य हांकां उर्बा दिवपा पासत वेगवेगळ्यो कार्यावळी, महोत्सत, संमेलनां आयोजीत करतात. हातूंतल्यान युवक हे कोंकणी चळवळीचें एक सशक्त आंग जातात.
गोंय विद्यापिठाच्या शणै गोंयबाब भाशा आनी साहित्य महाशाळेच्या कोंकणी अध्ययन शाखेन 2022 वर्सा सुरू केल्लो ‘युवा कोंकणी कथा संमेलन’ हो उपक्रम कोंकणी कथेच्या मळार घाल्लें एक म्हत्वाचें पावल. भाशेचें जतन, साहित्यीक विकास, युवकांच्या अभिव्यक्तीक संद दिवप तशेंच कोंकणीतल्या नव्या कथाकारांक स्वतंत्र माची दिवपाचें काम फाटलीं तीन वर्सां हें संमेलन करता. गोंय विद्यापिठान सुरू केल्लें संमेलन कोंकणी कथेच्या मळार नवीन कथा लेखकांक तयार करता आनी करतलें हातूंत मात्तूय दुबाव ना.
कथा मळार युवा उणे
कोंकणी साहित्याच्या मळार हेर साहित्य प्रकारांनी जसो युवकांचो सहभाग मेळटा, तसो कथेच्या मळार दिश्टी पडना. कथा हो साहित्य प्रकार हाताळपी खूब उणे युवा कथाकार कोंकणीत दिश्टी पडटा. खंयच्याय साहित्य प्रकाराचें मुल्यमापन हें गुणात्मक वैशिश्टांचेरूच जाता. पूण गुणात्मकते बरोबर संख्यात्मक योगदान तितलेंच गरजेंचें आसता. युवा कोंकणी साहित्य संमेलनातल्यान फाटलीं कितलीशींच वर्सां कथा लेखनाची सर्त जाता. युवकांच्या साहित्या खातीर गोंयात आशिल्ली एक सर्वोत्कृश्ट माची म्हणून हें युवा कोंकणी साहित्य संमेलनाची वळख आसा. संमेलन आपले परीन कथाकारां खातीर जायते यत्न करता. पूण कथा सर्तींत इनामां फाव जाल्ले बरेच कथाकार उपरांत कथेच्या मळार सातत्यान दिश्टी पडनात. गोंय विद्यापिठान हो हुस्को पळोवन फक्त कथेच्या मळार आशिल्ली ही उणीव भरून काडपाक आनी कोंकणीत नवे कथाकार निर्माण जावचे ह्या हेतून ह्या संमेलनाची बुन्याद घाली. दोन दिसांच्या ह्या संमेलनात कथाकारां कडल्यान कथा मागोवन, परिक्षकां कडेन चर्चा करून, तशेंच कथेचेर आदारीत वाचन- आस्वादन सत्रां दवरून मार्गदर्शनपर संमेलनाचें आयोजन करतात. युवा कथाकारांक स्वतंत्र माची दिवपा संदर्भांत हें संमेलन गरजेचें थारता.
चर्चा जायना
ह्या संमेलनाच्या निमतान कोंकणी कथेच्या आनी एकंदर साहित्याच्या मळार कांय म्हत्वाच्या विशयांचेर उजवाड घालन गरजेचो दिसता. पयलें म्हणल्यार युवकांच्या साहित्याचेर चर्चा. कोंकणी साहित्याच्या मळार जशें जेश्ठ लेखकांच्या पुस्तकांचेर चर्चा जातात, तशी चर्चा युवा बरोवप्यांच्या पुस्तकांचेर जाल्ली दिश्टी पडना. कांय परिसंवाद, कांय चर्चासत्रांनी हे प्रयोग जाल्यात. पूण अशे तरेचे उपक्रम आनीक जावप गरजेचें आसा. हातूंतल्यानूच युवा साहित्यीकांच्या साहित्याक आकार येतलो. समिक्षात्मक लेखक ह्या प्रक्रियेंत गरजेचें आसा. हातूंत युवकांक समिक्षा पचोवंक शिकची पडटली. हातूंतल्यान बरें साहित्य निर्माण जातलें. तशेंच समिक्षा व्यक्तिगत जाय नासतना वस्तूनिश्ठ जातली हाचीय जापसालदारकी समिक्षकांनी घेवची पडटली. कथा लेखनाच्या संदर्भांत ही समिक्षा साप्प गरजेची आसा.
सगल्या विशयांचे विद्यार्थी जाय
युवा कोंकणी कथा संमेलनाचे बाबतींत सांगपाचें जाल्यार कथांचेर चर्चा एका आदेसान करप शक्य जायना. जेन्ना दरेका कथेचें वाचन जाता आनी दरेका कथेंतल्या बारकाव्यांचेर आस्वादकीय चर्चा जाता तेन्ना ते कथेक योग्य न्याय मेळटा. हाका लागून कथा संमेलनांत चडांत चड वेळ हो युवकांनी धाडिल्ल्या कथांचे चर्चेक आसचो अशें दिसता. कोंकणी कथा संमेलनात कोंकणी विद्यार्थीच न्हय जाल्यार हेर विशयांच्या विद्यार्थ्यां मेरेन हें संमेलन कशें पावतलें हाचेर विचार जावपाक जायत. वैजकी, अभियांत्रिकी, उद्देगीक, वेवसायीक आदी क्षेत्रांत आशिल्ल्या युवकांनी कथा लेखनाच्या मळार येवप गरजेचें आसा. आयज जशें सगळें आंतरविद्याशाखीय जावपाक लागलां, तशेंच कोंकणी कथा दरेका क्षेत्रांतलो विद्यार्थी बरोवपाचो यत्न करतलो हाचेर कथा संमेलनान विचार करचो.
दर्ज्यात्मक भर पडटली
कोंकणी कथेच्या मळार सुरू केल्ल्या ह्या उपक्रमाक लागून महाविद्यालयीन मळार कथा ह्या साहित्य प्रकाराक लेखनाचे नदरेंतल्यान वळख मेळपाक लागल्या. जायते विद्यार्थी कथा लेखनाच्या मळार वावुरपाक लागल्यात. हे कथाकार दिसाळ्यांनी, नेमाळ्यांनी कथा बरयतना दिसतात. सर्तींत कथा धाडिल्ल्या कथाकारांकडेन विद्यापिठान संपर्क सादून तांकां सातत्यान बरोवपाक प्रोत्साहन दिवपाचें काम सुरू केलां. हातूंतल्यान फुडल्या कांय वर्सां भितर युवा कोंकणी कथा लेखकांची कोंकणी कथेच्या मळार संख्यात्मक आनी दर्ज्यात्मक भर पडटली.
विवीध कार्यावळी
ह्या वर्सा युवा गुजराती साहित्यीक राम मुरी हे संमेलनाक हजर रावतले. तशेंच तांचे ‘कथा कथन तंत्र’ ह्या विशयाचेर व्याख्यान जातलें, तशेंच तांची मुलाखत आयोजीत केल्या. कोंकणीतले नामनेचे कथाकार भालचंद्र गांवकार ह्या संमेलनाचे मुखेल सोयरे आसात. प्रसिद्धी कडल्यान पयस रावन आपलें साहित्य सिद्धीक कशें पावतलें हाचेर काम भालचंद्र गांवकार सारके कथाकार करतात. अशे व्यक्तीक दिल्लो हो योग्य भोवमान. तशेंच कोंकणीतल्यो नामनेच्यो साहित्यीक नयना आडारकार हांचें मूळ स्वर उलोवप आसतलें. कोंकणीतले दोन नामनेचे कथाकार डॉ हेमंत अय्या आनी गोरक शिरसाट कथाकारांक मार्गदर्शन करतले. एकंदर दोन दिसांच्या ह्या कथा संमेलनांत गोंय विद्यापिठांत कथामंथन जावपाचें आसा म्हणल्यार अतिताय जावची ना. कोंकणी कथेच्या विकासांत येवपी वर्सांनी ह्या संमेलनाचें भरीव योगदान दिश्टी पडटले हातूंत मात्तूय दुबाव ना.
गौरांग बाबुराव भांडीये
8552883808
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
