भांगरभूंय | प्रतिनिधी
भांगरभूंय । प्रतिनिधी
कोरगांवः दोन खांब धारगळ हांका लोकांचे मागणे प्रमाण सरकारान प्लाय ओव्हर बांदलो ना जाल्यार येता त्या लोकसभा वेंचणुकेंत भाजपाक धडो शिकोवपाची शिटकावणी धारगळ पंचायतीच्या ग्रामसभेंत लोकांनी दिल्या. 1 मार्च मेरेन मुख्यमंत्री आनी थळाव्या आमदारान समस्या सुटावी करपा खातीर यत्न केले ना जाल्यार आंदोलन करपाचेंय तांणी थारायलां.
दोन खांब तिठ्यार फ्लाय ओव्हर बांदचो अशी धारगळकारांनी मागणी आसा. ग्रामसभेंत ताचेर चर्चा जाली. 40 लोकांच्यो बोगस सयो करून सरकाराक दिल्ल्या तथाकथीत निवेदनाची दखल घेवन दोन खांब हांगा फ्लाय ओव्हर बांदपाचें रद्द केलें. फ्लाय ओव्हर बांदपाची मागणी करपी आमी चार हजार लोकांच्यो सयो आशिल्लें निवेदन दितात अशें ग्रामसभेंत लोकांनी संबंदितांक सांगलें.
आमदार प्रवीण आर्लेकार आनी मुख्यमंत्री डॉ प्रमोद सावंत हाचेर विस्वास दवोरून आमी ओगी आशिल्ले. मात हालींच विधानसभेंत धारगळच्या लोकांक गृहीत धरून मुख्यमंत्र्यांनी जे कितें सांगलें तें कळटगीर प्रवीण आर्लेकाराक फ्लाय ओव्हरा संबंदी मेळपाचें सोडून दिवचें अशें लोकांनी ग्रामसभेंत सांगलें. फ्लाय ओव्हराची मागणी पदरांत पडून घेवपा खातीर पंच वांगड्यांक वांगडा घेवंन जी समिती स्थापन केल्ली ती बरखास्त करून नवी समिती स्थापन करपाची मागणी केल्ल्यान ग्रामसभेत मात्सो बोवाळ जालो. समिती कित्याक बरखास्त करची हाची कारणा दिवपाची मागणी भारत बागकार हाणे केली.
फ्लाय ओव्हरा संबंदी प्रवीण आर्लेकार आनी जीत आरोलकार ह्या पेडणे तालुक्यांतल्या आमदाराची परत भेट घेवपाक ग्रामस्थांनी विरोध केलो. दोन खांब हांगा फ्लाय ओव्हराचो प्रस्न फकत धारगळ पंचायत वाठारांतल्या लोकांचो नासून पेडणे तालुक्यांतल्या रस्त्याच्या आशी कुशीच्या गांवच्या लोकांचो प्रस्न आशिल्ल्यान तांणी आंदोलनांत वांटेकार जावचें अशें आवाहन ह्या वेळार केलें. मांद्रेचो आमदार जीत आरोलकार आनी लोक ह्याच मार्गान येतात- वतात तेन्ना तांणी फ्लाय ओव्हराचे मागणे खातीर धारगळकारांच्या आंदोलनांत वांटो घेवचो अशें ग्रामसभेंत लोकांनी मागलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
