भांगरभूंय | प्रतिनिधी
बायणा- वास्कोच्या दरोडो प्रकरणाचो वास्को आनी हेर कडले पुलीस आपले परीन तपास करतात, मात तांकां काल सांज मेरेन ह्या गुन्यांवांत घुस्पल्ले दरोडेखोर सांपडूंक नाशिल्ले. 35 लाखांचो म्हाल चोरयेक गेला. तातूंत कुटुंबाक मारपेट जालो तो वेगळो. भिरांकूळ प्रकार आशिल्लो तो. तातूंत तुस्त करूंक जाय ती ल्हान चलयेची. बांदून घाल्ल्या घरच्यांक ताणें सोडयलीं, भायलें दार बंद केल्ल्यान दरोडेखोरांनी कापिल्ल्या जनेलांतल्यान भायर सरून शेजाऱ्यांक, काकाक उठयलो. दुसऱ्या एका शेजाऱ्यान पुलिसांक आपयले…. हेय टोळयेची दरोड्याची शैली दोनापावल आनी म्हापशें सारकीच आसा. मात ह्या वेळार सीसीटीव्ही ना थंयच्यान ते भितर आयल्यात. मास्क, हेल्मेटाचोय वापर केला. दर दोन म्हयन्यांनी एक दरोडो पडपाक लागला. म्हणटकच सरकारान पुलिसांचेर तपासा खातीर चेपण हाडचें पडटलें. समाजानूय जागृत रावंक जाय. कारण दिसा उजवाडा घरांची ‘रेकी’ (टेहळणी) करपाक अनवळखी मनीस भोंवपाची भिरांत आसता.
बायणाचो दरोडो पडलो तें घर एकोडें न्हय. सात मजली इमारत ती. बरेच फ्लॅट. म्हणटकच लोकूय चड आसतले. मात हो वेळ मध्यानरातींचो. अडेज ते चार मेरेन तरी चडशे लोक सुस्त न्हिदिल्ले आसतात. जागृत न्हीद आसल्यारुच जाग येवपाची. नायक कुटुंबान दुबाव उक्तायला, ते प्रमाण इमारतीची, कुटुंबाची म्हायती आशिल्ल्यानूच हो दरोडो घाला वा दरोडेखोरांक ताणें मजत केल्या!! बांगलादेशांत पळून गेल्ले तेच हे दरोडेखोर काय थळावे, ताचो तपास पयलीं करचो पडटलो. गाडी तांची काय नायक कुटुंबाची तेंय पळोवचें पडटलें. रातचीं कोणाचीं बार्रां, पब बी उक्ते आसतात, तांचे कडेन ह्या दरोडेखोरांच्या वर्णनाचे कोण दिशिल्ले काय ते सोदचें पडटले. ह्या दरोड्या फाटल्यान वेवसायांतली दुस्मानकाय बी आसा? आतां लोक पुलिशेचेर टिका करपाक लागल्यात, सरकाराकूय दोश दिवंक लागल्यात. गस्त आनीक कडक केले बगर ह्यो चोरयो, दरोडे बंद जावचे नात. फुडल्या म्हयन्यांत पर्यटन मोसम तेंगशेर आसता, म्हणटकच गोंयांत येवप्यांचो आंकडो चड आसतलो. एकूणच पुलिसांक तारे वयली कसरत करची पडटली.
सोशल मिडियाचेर हो दरोडो गाजता. कांय जाणांनी गिरेस्तांक पिस्तुलाचो परवानो दिवचो, असो विचार उक्तायला. मात, हें आंगलट येवं शकता. कारण, कोणूय तिडकी सरशीं घरांतूच फार पेटोवंक शकतात. पिस्तुल काडचे पयलीं चोरुय हल्लो करूंक शकतात. दुसरो उपाय गुरख्याचो. रातभर जागो रावपी सशस्त्र, निर्व्यसनी गुरखो मात जाय! असल्या वेळार सुणीं मजतीक येतात. बायणाचे इमारतींत एकूय सुणो नाशिल्लो दिसता! पोशिल्लो वा बेवारशी!! आशिल्लो जाल्यार तो आकांतान भुंकपाचोच. लोकांक जाग येवपाची. इमारतींक उजो लागल्यार तो पालोवपाक हायड्रंट आसतात, तसोच आणिबाणीच्या वेळार हेरांक आपोवपाक सायरन, अलार्म लावप शक्य आसा? तो प्रत्येकाच्या घरांत आसत जाल्यार बरें. इमारतींत रावप्यांचो व्हाॅट्सअॅप ग्रुप जाय. अचानक कितें जाल्यार मॅसेज, फोन करपाक मेळटा. मुखेल दारांक सेटर वा ग्रील लावपाचो वेळ आतां गोंयकारांचेर आयला. कांय गांवांनी तरणाटे आळीपाळीन गस्त घालतात. गोंयांत तें शक्य जायतशें दिसना. मात, पुलिसांची गस्त जाय. भायल्या राज्यांनी वचपाचे वाटेर चड कडक बंदोबस्त जाय. सीसीटीव्हीय जाय. इमारतींनी, एकोड्या बंगल्यांनी रावपी लोकांनी कोणाचो दुबाव आयल्यार ताची म्हायती पुलिसांक दिवंक फावो. पुलिसांनीय मागीर अनवळख्यांचेर गुपीत नदर दवरूं येता.
मुरगांव म्हालांतलो हो हालींच्या वर्सांतलो सगल्यांत व्हडलो दरोडो. चोरयो, मारामारी, दरोडे वाडूंक लागिल्ल्यान पुलिसांचे प्रतिमेक खत लागलां. तें जाता तितलें बेगीन पुसचें. हे गुन्यांव अशेच चालू उरले जाल्यार भायल्या विशीं असंतोष निर्माण जावं शकता. हें चड धोक्याचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
