दोनापावल अपघात जाल्ले सुवातेर रंबलर्स बसोवचे

भांगरभूंय | प्रतिनिधी

उत्तर गोंय जिल्लोधिकार्‍याचो आदेश

पणजीः दोनापावला अपघातांत एके चलयेचो जीव गेले उपरांत सरकाराक आतां जाग आयल्या. वाहनांची गती ल्हव करपा खातीर अपघातांत जाल्ले सुवातींचेर तीन कडेन जिल्लोधिकार्‍यान रंबलर घालपा खातीर मान्यताय दिला. हे विशींची अधिसुचोवणी जिल्लोधिकारी तशेंच जिल्लो दंडाधिकारी हांणी जारी केल्या.
आयतारा रातचे वेळार दोना पावला सिदाद दि गोवा होटेला लागसार एक नेटान येवपी मीनी कुपर गाडयेन एका मोटरसायकलीक धपको दिल्लो. ह्या अपघातांत मोटरसायकल उसळून पडली आनी फाटीं बशिल्ले एका चलयेक जाग्यार मरण आयलं,े जाल्यार दुचाकी चालक गंभीर जखमी जालो.
आतां हे घडणुकेची दखल घेवन सराकारान हे सुवातेर फुडाराक अपघात जावचे न्हय म्हूण उपाय येवजण चालीक लायल्या. मोटार वाहन कायदे, १९८८ च्या कलम ११२ आनी मोटार वाहन नेम, तल्या नेम २६४-ए खाला तशेंच पणजीचें भौशीक बांदकाम खात्याचे सहाय्यक अभियंते आनी येरादारी पुलीस उप अधिक्षक आल्तीन-पणजी हांचे शिफारसी प्रमाण, उत्तर गोंय जिल्हो दंडाधिकारी अंकित यादव हांणी

ताळगांव पंचायत वाठारांत येवपी ताज सिदाद दी गोवा च्या प्रवेशद्वारा लागसार चार सुवातांचेर रंबलर्स स्ट्रिप्स घालपाचे आदेश काडला.
हातूंत दोना पावला दिकेन वचपी रस्त्याचेर, सिदाद दी गोवाच्या प्रवेश दारा भायर वचपाच्या मार्गाच्या १५ मिटर पयलीं आनी ५ मिटर उपरांत रंबलर्स स्ट्रिप्स घालचे. बांबोळे कडेन वचपी रस्त्या वयल्यान खाला वचपी रस्तो जंक्शनाच्या ५ मिटर पयलीं रंबलर्स स्ट्रिप्स घालचे आनी नागाळी हिल्सा कडेन वचपी भितर रस्त्या वयल्या ’टी’ जंक्शन पसून १० मिटर अंतराचेर रंबलर्स स्ट्रिप्स घालपाचे निर्देश दिल्यात.
रंबलर्स स्ट्रिप्सांक धव्या रंगाचो थर्मोप्लास्टीक फ्लोरोसण्ट पेन्ट लावचो आनी अदीक स्पश्टपणान दिसपा खातीर ताचेर ब्लिंकर्स बसोवचे. तशेंच, मोटार वाहन येरादारीचें नियमन करपा खातीर रस्त्याच्या दोनूय वटांनी सुमार ४० मिटर पयलीं रंबलर्स अशें सादूरतायेचे सुचोवणी तकटे आनी प्रत्यक्ष रंबलर्साचे सुवातेर रंबलर्स’ दाखोवपी येरादारी चिन्न तकटे लावचे.
हे सुवातेर रंबलर्स आनी सुचोवणी तकटे लावपा खातीर वेवस्था करची आनी ३० दिसां भितर ह्या आदेशाचे पुर्ततायेचो अहवाल सादर करचो, असो आदेश जिल्लोधिकार्‍यान काडला.