भांगरभूंय | प्रतिनिधी
पांच दिसांची पुलीस कोठडी
भांगरभूंय । प्रतिनिधी
पणजी : दोनापावलाचे उद्देजक जयप्रकाश धेंपो हांच्या बंगल्याचेर दरोडो आनी म्हापशेंच्या डॉ. घाणेकार हांच्या बंगल्याचेर सशस्त्र दरोडो घालचे खातीर रेकी करपी आनी दरोडेखोरांचे टोळयेक मजत करपी दुबावीत महमूद अली (46. रा. कळंगूट आनी मूळ सहारनपूर, उत्तर प्रदेश) हाका पणजी पुलिसांनी अटक केल्या. दुबाविताक पणजी प्रथमवर्ग न्यायालयान पांच दीस पुलीस कोठडी फर्मायल्या.
नागाळी- दोनापावलचे उद्देजक जयप्रकाश धेंपो हांच्या बंगल्याचेर 20 एप्रील 2025 ह्या दिसा मध्यानरातीर दरोडो घातिल्लो. त्याच वेळार दरोडेखोरांनी सुरवेक सुरक्ष रक्षकाचेर हल्लो केल्लो. तशेंच धेंपो जोडप्याक बंदी करून दरोडो घातिल्लो. दरोडेखोरांनी घरांतले सीसीटीव्ही रेकॉर्डर काडून व्हेल्ले. तशेंच सुमार एक कील भांगराचे वस्तीं सयत 2 लाख रुपयांची रोख रकम दरोडेखोरांनी व्हेल्ली.
हेच मजगतीं 7 ऑक्टोबराक फांतोडेर 3 ते 5 वरां मजगतीं डॉ. महेंद्र घाणेकार हांच्या बंगल्याचेर बुरखो घातिल्ल्या स दरोडेखोरांनी सशस्त्र दरोडो घातिल्लो. घाणेकार कुटुंबियांक बंधक करून घरांतलो 35 लाखांचो मुद्देमाल चोरिल्लो.
ह्या प्रकरणांत दरोडेखोरांक मजत करपी संतोष बाबू बी. (27. रा. इब्बलुरू बंगळुरू) आनी सफिकुल रोहुल अमीर (37. रा. इब्बलुरू बंगळुरू) ह्या दोनूय मूळ बांगलादेशी नागरिकांक म्हापशें पुलिसांनी मंगळारा 14 वेर अटक केल्ली. ह्या दोगांची उत्तर गोंय पुलीस आनी गुन्यांव फांट्यान चवकशी केली. तशेंच तंत्रीक तपास केले उपरांत दुबावीत महमूद अली हाचो वयल्या दरोड्यांत आस्पाव आशिल्ल्याचें मुखार आयलें.
पुलिसांनी अदीक चवकशी केली, तातूंत दुबावीत महमूद अलीन वयल्या बंगल्यांची रेकी करून दरोडेखोरांक म्हायती दिल्ल्याचें मुखार आयलें. वयल्या दरोड्यांतल्या मुख्य दुबाविताचे लागींचे संबंद आसा आनी फरार बांगलादेशी दरोडेखोरांक दुबावितान मजत केल्ल्याचें उक्तें जालां. तेचवरी गुन्यांवा आदीं आनी उपरांत ताणें मुख्य दुबावितांक रावपा खातीर आलाशिरो दिल्ल्याचेंय मुखार आयलां. ते उपरांत दुबावीत महमूद असीक अटक केली. अटक केल्ल्या दुबाविताक पणजेच्या प्रथमवर्ग न्यायालयांत हाजीर केलो, तेन्ना न्यायालयान दुबाविताक पांच दिसांची पुलीस कोठडी फर्मायली.
पणजी पुलिसांनी अटक केल्लो दुबावीत महमूद अली हाचो वेर्णें पुलीस स्टेशनाच्या एका गुन्यांवांत वांटो आशिल्ल्याचें मुखार आयलां. तो कोलवाळ बंदखणींत आशिल्लो. त्या वेळार दुबावीत अली आनी हेरांनी दोनापावला तशेंच म्हापशें आनी हेर वाठारांनी दरोडो घालपाचें कारस्थान रचिल्ल्याचें मुकार आयलां. 22 मे 2023 ह्या दिसा अली आनी हेरांनी विद्यानगर- जुवारीनगरांतल्या एमईएस म्हाविद्यालय मार्गार आशिल्लो ‘जयमाला’ बंगलो फोडपाचो यत्न केल्लो. त्या वेळार वयली म्हायती मेळटाच वास्कोचे तेन्नाचे पुलीस उपनिरिक्षक स्वप्रिल नायक, चालक यशवंत देसाय आनी गृहरक्षक प्रल्हाद नायक हांचे सयत बंगल्याचे दिशेन गेल्ले. त्या वेळार चोरांनी उपनिरिक्षक स्वप्रिल नायक हांचे दिशेन पिस्तुलांतल्यान गुळयो मारिल्ल्यो. ह्या प्रकरणांत अली हाका अटक केल्ली. तशेंच लोटलेच्या आंबोरा वाठारांत कपेला लागसार बशिल्ले जाण्टे बायलेच्या हातांतलीं कांकणी आनी त्याच वाठारांत दुचाकीचेर बशिल्ले चलयेच्या गळ्यांतली भांगराची सरपळी लेगीत चोरांनी फारायल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
