भांगरभूंय | प्रतिनिधी
पणजी : दोना पावल वाठारांतल्या मणिपाल हॉस्पिटला लागसार आयतारा रातीं एके धोफरायत आयिल्ले ‘मिनी कूपर’हे आलिशान मोटारीन मोटरसायकलीक नेटाचो धपको दिलो. ह्या भिरांकूळ अपघातांत मोटरसायकलीचेर बशिल्ली दीक्षा पारवाडकर (23. मूळ रा. कर्नाटक) हे चलयेक सुवातेचेरूच मरण आयलें. जाल्यार मोटरसायकल चालक डी. अरूण (रा. मडगांव, मूळ चेन्नय) गंभीर जखमी जालो. ह्या प्रकरणांत पणजी पुलिसांनी मोटार चालक डॅरियस डायस (22. रा. चिकोळणा, बोगमाळो- वास्को) हाचे आड गुन्यांव दाखल करून अटक केली.
दीक्षा पारवाडकर ही दोना पावल वाठारांतल्या हॉटेल सिदादी गोवांत कामाक आशिल्ली. तिचे वांगडा आशिल्लो आनी ह्या अपघातांत गंभीर जखमी जाल्लो मोटरसायकल चालक डी. अरूण हो लेगीत त्याच हॉटेलांत काम करतालो. हळडुव्या रंगाची मिनी कूपर मोटार खुबूच धोफरायत वतना चालकाचें गाडये वयलें नियंत्रण सुटलें आनी ताणें फुडल्यान येवपी मोटरसायकलीक धपको मारलो, अशी म्हायती हो अपघात प्रत्यक्ष पळोवप्यांनी दिली.
घडणुकेची म्हायती मेळटाच पणजी पुलीस निरिक्षक विजयकुमार चोडणकार हाच्या मार्गदर्शना खाला हवालदार समीर नायक हांणी घडणुकेचे सुवातेर वचून पंचनामो केलो. जाल्यार पुलीस उपनिरिक्षक महादेव पेडणेंकार हांणी मोटार चालक डॅरियस डायस हाचे आड गुन्यांव दाखल करून अटक केली.
अपघातांत सांपडिल्ल्यो दोनूय गाडयो पुलिसांनी जप्त केल्यात. चालकान सोरो पियेल्लो काय किते ताचो तपास पुलीस करतात.
उपचारा आदींच मरण
ह्या अपघातांत दुचाकी वयले दोगूय हवेंत वयर उसळ्ळे आनी रस्त्याचेर आदळ्ळे. अपघाताचो आवाज आयकून थंय आशिल्ले लोक आनी हॉस्पिटलांतले कर्मचारी मजती खातीर धांवून आयले. दीक्षाक ताकतिकेन लागींच्या हॉस्पिटलांत उपचारा खातीर व्हेली. गंभीर जखमी जाल्ल्या दीक्षाक दोतोरांनी तपासून मरण आयिल्ल्याचें घोशीत केलें. अरूण हाचे तकलेक आनी पांयाक खुबूच मार बसला आनी ताची भलायकी हुस्क्याची आसा. सोमारा 6 एप्रीलाक दीक्षाचे कुडीचो पोस्टमार्टम केले उपरांत तिची कूड तिच्या घरच्यांचे सुवादीन दिली.
खर कारवायेची मागणी
दोना पावल आनी मळभाट वाठारांतले रस्ते रूंद आशिल्ल्यान रातच्या वेळार गाडयो धोफरायत वतात. पर्यटन मोसम आनी थळाव्यांची येरादारी पळोवन, पुलिसांनी अश्या हाय- स्पीड झोनांत गस्त वाडोवप गरजेचें आसा. फकत दंद दिनासतना बेजापसालदार चालकांचे परवाने सासणाचे रद्द करचे आनी दोशींचेर खर कारवाय करची, अशी मागणी लोकांनी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
