भांगरभूंय | प्रतिनिधी
भांगरभूंय | प्रतिनिधी
पणजी : तिसवाडी तालुक्यांतले एके बायलेक घरांतल्यान काम करपाचें (वर्क फ्रॉम होम) सांगून 3.27 लाख रुपयांची तोपी घालपाचो प्रकार उक्तडार आयलां. ह्या प्रकरणांत पणजी पुलिसांनी दुबावीत रज्जब हुसेन (जोधपूर, राजस्थान) हाका अटक केल्या. पणजेच्या पयलो वर्ग न्यायालयान दुबाविताक सात दिसांची पुलीस कोठडी फर्मायल्या.
पणजी पुलिसांनी दिल्ले म्हायती प्रमाण ह्या प्रकरणांत दोनापावलाचे दीपा योगी हांणी कागाळ दाखल केल्या. ते प्रमाण 5 जून 2025 दिसा सांजवेळा 7.35 वरांचेर एका अनवळखी मनशान व्हॉट्सअॅपा वरवीं तिचे कडेन संपर्क केलो. ताणें तिका वर्क फ्रॉम होम नोकरी दिवपाची ऑफर दिली आनी वेगवेगळ्या हॉटेलांक रेटींग दिवपाक सांगलें. ते खातीर ताणें तिका व्हॉट्सअॅपा वरवीं मॅसेज धाडले. ह्या वेळार तिका टेलिग्राम अॅपांत एका ग्रुपांत सामील जावपाक सांगलें. ते उपरांत तिका जीपे आनी हेर अॅपा वरवीं 3.27 लाख रुपयांची गुंतवणूक करपाक सांगलें. आपली फटवणूक जाल्ल्याचें कळटकच तिणें पणजी पुलीस स्टेशनार कागाळ दाखल केली.
ह्या प्रकरणांत पणजी पुलिसांनी गुन्यांव नोंद करून तपास सुरू केला. मजगतीं, दुबावीत राजस्थानांतल्या जोधपूरांत आशिल्ल्याची म्हायती पुलिसांक मेळ्ळी. ते प्रमाण पुलीस अधिक्षक राहुल गुप्ता आनी उपअधिक्षक सुदेश नायक हांच्या मार्गदर्शना खाला निरिक्षक विजयकुमार चोडणकार हांणी उपनिरिक्षक साहिन शेट्ये, हवालदार प्रथमेश मळीक, गौतम मटकार, आदित्य म्हाड्डोळकार आनी अमोल हट्टेकर हांच्या पंगडाचें फुडारपण करून दुबावीत रज्जब हुसेनाचो सोद घेतलो. ते उपरांत दुबाविताक गोंयांत हाडून अटक केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
