भांगरभूंय | प्रतिनिधी
पणजी : दोनमाड-केरी, सत्तरींत काल रातीं उसरां अनवळख्यांनी काळखाचो फायदो घेवन पांच दुकानां फोडपाचो यत्न केलो. सुरवातेक तीन दुकानां फोडपांत ते अपेशी थारले. उपरांत तांणी नळे काडून भितर सरपाचो यत्न केलो. मात तेंय तांचे कडेन शक्य जावंक ना. उपरांत चोर हॅर कटींग सलुनांत चोरपाक गेले. थंय प्रवेश करपाक मेळूंक नाशिल्ल्यान तांणी वायन शॉपांत चोरी केली. थंयच्यान चोरांनी सोर्याच्यो बाटल्यो चोरल्यो.
आयज सकाळीं हे विशीं कळटांच पुलिसांक कळयलें. पुलिसांनी पंचनामो करून तपास सुरू केलो. मजगतीं फाटल्या म्हयन्यांतूय ह्या वाठारांतलें एक घर फोडून भांगरा वस्ती आनी पयशे चोरांनी चोरिल्ले. पुलिसांनी ठशेतज्ज्ञ आनी डॉग स्कॉडाचे मजतीन चोरांचो सोद घेतलो.
दोनमाडा पसून सामको लागींच केरी चेकपोस्ट आसा. हांगा रातच्या वेळार पुलीस बंदोबस्त आसता. एका उल्याच्या अंतराचेर आसूनय पुलिसांक काल रातीं हे चोरयेची सुलूस कशी लागूंक ना असो प्रस्न थळावे सध्या करतात. लोकांनी पुलिसांक गस्त वाडोवची अशी मागणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
