भांगरभूंय | प्रतिनिधी
दमोह, खबरां संस्था: तुमी हाचे पयलीं बोगस दोतोरां विशीं जायत्यो खबरो वाचल्यात, आयकल्यात आसतल्यो. तेच प्रमाण कंपाउंडर वा योग्य शिक्षण नाशिल्ल्यांनी केल्ले शस्त्रक्रियेच्योय खबरो उजवाडाक येतात. हालींच मध्य प्रदेशांत अशेच एके खबरेक लागून बरोच बोवाळ जाला. हांगाच्या एका कथीत दोतोराक लागून सात दुयेंतींक मरण आयलां.
कोण हो बोगस दोतोर?
मेळिल्ले म्हायती प्रमाण, ही पुराय घडणूक मध्य प्रदेशांतल्या दमोह जिल्ह्यांत घडली. हांगा एका बोगस दोतोरान ७ दुयेंतींचेर शस्त्रक्रिया केल्यात. पूण ह्या सातूय दुयेंतींक मरण आयलां. एका खासगी मिशीनरी हॉस्पिटलांत हें घडलां आनी कथीत बनावट दोतोराचें नांव नरेंद्र विक्रमादित्य यादव अशें आसा. नरेंद्र आपलें नांव बदलून हांगच्या लोकांक आपूण दोतोर आशिल्ल्याचें सांगतालो.
एका म्हयन्यांत ७ जाणांक मरण
आपलो जल्म आनी शिक्षण मुळचें ब्रिटनचें आशिल्ल्याचो दावो नरेंद्र करतालो. ताणें स्वताचें नांव दोतोर एन जॉन केम अशें सांगिल्लें. ह्याच नांवान तो जायत्या जाणांक मेळटालो. आपूण हार्ट स्पेशलीस्ट दोतोर आशिल्ल्याचें सांगून तांणी वट्ट ७ दुयेतींचेर काळजाच्यो शस्त्रक्रिया केल्यो. हातूंत सगल्या दुयेतींक मरण आयलें. एका म्हयन्यांतूच ह्या दोतोरान ऑपरेशन केल्ले सात दुयेंती सोंपले.
…उपरांत जाली चवकशी
ताणें आपूण ब्रिटनांतलो नामनेचो दोतोर अशें सांगून क्रिस्तांव मिशनरी हॉस्पिटलांत नोकरी मेळयल्ली. हांगाच्या दुयेंतींचेर तो काळजाचो रोग तज्ञ म्हणून उपचार करतालो. नरेंद्र यादवान ज्या दुयेंतींचेर ऑपरेशन केलें तांकां उपरांत मरण आयलें. मागीर दोतोराच्या वैजकी शिक्षणा विशीं चवकशी जाली. हे चवकशे वेळार ह्या मनशाचें नांव एन.जॉन केन न्हय, तर नरेंद्र यादव अशें कळ्ळें. आतां ह्या प्रकरणांत केस नोंद जाल्या.
ह्या रॅकेटांत हेरांचोय आसपाव?
ह्या प्रकरणांत नरेंद्रा आड मनीस खुनाची केस दाखल जावपाची शक्यताय आसा, आनी योग्य तपास करिनासतना मनशाक कामाक घेतिल्ल्यान हॉस्पिटलाचेर कारवाय जावपाची खर शक्यताय आसा. सध्या पुलिसांनी ह्या रॅकेटांत आनीक कोणाचो हात आसा काय हाची चवकशी करपाक सुरू केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
