भांगरभूंय | प्रतिनिधी
म्हजें मत
गजाल फाटल्या 27 डिसेंबराची. सकाळच्या 10 वरांचेर एक दुयेंत मनीस वैजकी सल्लो घेवपाक जीएमसीचे ओपीडींत आयिल्लो. ताणें खाजगी हाॅस्पिटलांत उपचार घेतिल्ले. त्या वेळार वरिश्ठ दोतोर ताचो वैजकी इतिहास बरयतालो. हेर कनिश्ठ दोतोरां कडेन उलयतालो. इतल्यान एका दोतोरान प्रस्न केलो. ‘जर खाजगी हाॅस्पिटलांत उपचार घेतल्यात जाल्यार तो हांगा कित्याक आयला?’ बरोवपी दोतोरान नम्रपणान ताका जाप दिली. आपलें काम चालू दवरलें. तिची तोखणाय करीत तितली थोडी.
हो प्रस्न सरकारी दोतोरांक विचारपाक मेळटा? तोय दुयेंती सामकार? ताची मानसीक स्थिती कितें जातली? भलायकी मंत्र्यान हाची दखल घेवन अशें परत घडचें न्हय, म्हूण परिपत्रक काडपाची गरज आसा. खंयचोच दोतोर सरकारी हाॅस्पिटलांतल्यान हांगा कित्याक आयला, खाजगी हाॅस्पिटलांतल्यान हांगा कित्याक आयला, अशे प्रस्न विचारपाक शकना. दोतोरान तपासपाचें, वखदां दिवपाचें काम करचें. दोतोरांच्या मेजार ताचें नांव आसपाक जाय. म्हणटकच आमकां बऱ्या दोतोरांची तुस्त करपाक मेळटली. ओपीडींतले दोतोर बरे. ते बायल दोतोरान कनिश्ठ दोतोराक बरे तरेन समजायलो.
कोणाची कागाळ करपाचो, बदनामी करपाचो म्हजो हेतू ना. दोतोरांनी दुयेंतींक केन्नाच निरशेवपाक जायना. ताका धीर दिवंक जाय. दोतोर हो देव आसता. तुका हांगा कोणें धाडला, आतां आयला, मागीर तो हांगा कित्याक आयला, असले प्रस्न विचारप बंद करचें. दुयेतींचें मनोबल तिगपाक जाय. वैजकी सेवा दिवपांत गोंय मुखार आसा…. तो प्रस्न विचारपी कनिश्ठ दोतोर मागीर दुयेंती कडेन बरो उलयलो. तुमकां कितें त्रास जायत जाल्यार केन्नाय येयात म्हणपाक लागलो. पूण पयलीं छाप ती निमणी छाप आसता. ताका लागून दोतोरांनी कामाचो ताण आसलो तरी दुयेंतीं कडेन सदांच बरें उलोवचें.
– राजेश बाणावलीकार,
हडफडें, बार्देश
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
