भांगरभूंय | प्रतिनिधी
निवासी दोतोर अजून संपार; गोमॅकाँतल्या सेवेंचेर परिणाम
भांगरभूंय । प्रतिनिधी
पणजीः कोलकातांतल्या (पश्चीम बंगाल) महिला दोतोराचेर अत्याचार करून तिचो खून केल्ले घडणुकेचो निशेध करचे खातीर गोंय वैजकी म्हाविद्यालयांतल्या (गोमॅकॉ) निवासी दोतोर आनी विद्यार्थ्यांचें आंदोलन सोमारा लेगीत चालू आशिल्लें. ताचो परिणाम गोमॅकाँतल्या सेवांचेर आनी थंय येवपी दुयेंतींचेर जाल्ल्याचें सोमारा दिसून आयलें.
कोलकारांतले घडणुकेचो निधेश नोंद करचे खातीर भारतीय वैजकी असोसिएशनान (आयएमए) देशभरांत शेनवारा संप जाहीर केलो. आयएमए खाला येवपी खाजगी दोतोरांनी शेनवारा सकाळीं 6 ते आयतारा सकाळीं 6 ह्या काळांत ओपीडी बंद दवरपाच्यो, पूण आपत्कालीन सेवा चालू दवरपाच्यो सुचोवण्यो दिल्यो.
निवासी दोतोर संपार आशिल्ल्यान खूबश्या दुयेंतींक फुडल्यो तारखो दिवन परतून धाडले. निवासी दोतोर संपार आशिल्ल्यान तत्काळ उपचार मेळपाक शकचे नात, अश्यो जापो थंयच्या कर्मचाऱ्यां कडल्यान मेळिल्ल्यान गोंयच्या विवीध वाठारांतल्यान उपचारां खातीर आयिल्ल्या दुयेंतीं मदीं नाराजी पातळ्ळी.
कोलकातांत घडिल्ली घडणूक निश्चीत मनीसपणाक खत लावपी अशीच आसा. ह्या प्रकरणांतल्या आरोपींक बेगिनात बेगीन ताब्यांत घेवन तांचेर खर कारवाय जावपाकूच जाय, अशें आमचेंय मत आसा. पूण गोमॅकाँत उपचारा खातीर येवपी दुयेंतींचो जीव थंय काम करपी दोतोरांच्या हातांत आसा. ताका लागून निवासी दोतोरांनी आंदोलन फाटीं घेवन, दुयेंतींक उपचार दिवप गरजेचें आसा, अशी प्रतिक्रिया कांय दुयेंतींनी आनी दुयेंतींच्या घरच्यांनी दिल्या.
शेनवारच्यान गोमॅकॉ भायर आंदोलन
आयएमएच्या गोंय फांट्यान संपाक तोंको दिवन शेनवारा सकाळीं 6 ते आयतारा सकाळीं 6 मेरेन ओपीडी बंद दवरल्यो. तशेंच आयतारा पणजे मूक मोर्चो लेगीत काडलो. आयएमएच्या संपाक गोमॅकाँतल्या निवासी दोतोरांनी तेंको दिवन, शेनवारच्यान गोमॅकॉ भायर आंदोलन केलें. तांचें आंदोलन सोमाराय चालू आशिल्लें. ताका लागून गोमॅकाँत येवपी दुयेंतींचेर परिणाम जाल्ल्याची म्हायती कांय जाणांनी दिली.
न्याय मेळा मेरेन संप…
कोलकाताच्या महिला दोतोर अत्याचार आनी खुनाचे घडणुकेचो निशेध करपा खातीर गोंय वैजकी म्हाविद्यालयांतले निवासी दोतोरांचो (रेसिडेंट डॉक्टर्स) संप सोमारा चवथ्या दिसा चालू आशिल्लो. संप केन्ना सोंपतलो, हाची ठोस आनी अधिकृत म्हायती कोणूच दिना. निवासी दोतोरांनी संपाचें पत्र दिल्लें, तातूंत सोमार मेरेन संप आसतलो, असो उल्लेख आशिल्लो, अशी म्हायती गोंय वैजकी म्हाविद्यालयाचे डीन डॉ. शिवानंद बांदेकार हांणी दिली. निवासी दोतोरांची (गार्ड) समिती बरखास्त जाल्या. नवी समिती स्थापन जावंक ना. हाका लागून गार्ड संघटणेच्या संपा विशीं कोणूच अधिकृत तरेन म्हायती दिवंक ना. न्याय मेळा मेरेन संप चलतलो, अशें संपार आशिल्ल्या दोतोरांनी सांगलें. ओपीडी आनी आप्तकालीन सेवा चालू आसल्यो तरी दुयेंतींक संपाचो मार बसपाक लागला. दोतोरांचो उणाव आशिल्ल्यान सोमारा ओपीडींत आयिल्ले खूबशे दुयेंतीं तपासणी करिनासतना घरा गेले. खात्यांचे मुखेली आनी सल्लागारांचे मजतीन ओपीडी आनी आप्तकालीन सेवा चालू आसा, अशी म्हायती गोंय वैजकी म्हाविद्यालय हॉस्पिटलाचे डीन डॉ. शिवानंद बांदेकार हांणी दिली.
गोंय वैजकी म्हाविद्यालयाच्या निवासी दोतोरांनी शुक्रारच्यान संपाक सुरवात केल्ली.
डीन, सल्लागार तशेंच मुखेली ओपीडींत सेवा दितात. आपत्कालीन सेवा तशेंच गरजेची शस्त्रक्रिया संपा वयले निवासी दोतोर लेगीत करतात. देशभरांतल्या सरकारी निवासी दोतोरांनी संपाचो निर्णय घेतला. हाका लागून गोंय वैजकी म्हाविद्यालयांतले निवासी दोतोर संपार आसात. देश पावंड्या वयल्या निवासी दोतोरांनी संप फाटीं घेतले उपरांत गोंय वैजकी म्हाविद्यालयांतले (गार्ड) संप फाटीं घेतले.
निवासी दोतोरांच्या आंदोलनाक लागून गोमॅकाँतल्यो नियमीत तपासण्यो बंद उरल्यो. पूण ओपीडी, शस्त्रक्रिया आनी हेर सगळ्यो आपत्कालीन सेवा चालू आसल्यो. ताका लागून गोमॅकाँत येवपी दुयेंतीचेर व्हडलोसो परिणाम जावंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
