भांगरभूंय | प्रतिनिधी
भांगरभूंय । प्रतिनिधी
दोडामार्ग : मणेरी- धनगरवाडीचो फाटलीं दोन वर्सां बेपत्ता आशिल्लो उमेश बाळू फाले (32) हाचो खून जाल्ल्याचें उक्तडार आयलां. सिंधुदुर्ग पुलिसांनी ही गजाल उसरां काय जायना पूण सोदून काडली. दुबावीत उसप गांवांतले आसात. तिगांकूय अटक केल्या. राजाराम काशीराम गंवस (34), सचीन महादेव बांदेकार (33) आनी अनिकेत आनंद नायक (25) अशीं तांचीं नांवां.
पुलिसांनी दिल्ले म्हायती प्रमाण, दुबावीत राजाराम गवस हाचे कडेन उमेश हाचे बायलेचे अनैतिक संबंद आसा, ह्या दुबावा वयल्यान उमेश हो राजारामाक गाळी संवतालो. ते तिडकींतल्यान ताचो काटो काडपाक राजारामान आपल्या दोन वांगड्यांचे मजतीन ताचो खून केल्ल्याचें तपासांतल्यान भायर सरलां. बेपत्ता व्यक्तीचो खून जाला हें सोदून काडपाची दोडामार्गांतली ही पयलीच घडणूक. खुन केल्ल्याचें दुबावितांनी कबूल केलां आसलें तरी दोन वर्सां उपरांत उमेश फाले हाचे कुडीचे अवशेश सोदप हें व्हडलें आव्हान पुलिसां मुखार आसा. ताका लागून आतां पुलीस ही केश न्यायालयांत कशी उबी करतात, हाचे कडेन लोकांचें लक्ष लागलां.
खून केला तें कशें कळ्ळें?
उमेश फाले हो आपले घरकान्नीक बाजारांत वचून दूद घेवन येता अशें सांगून 18/05/2022 दिसा सांजवेळार 6.30 क भायर सरलो तो परत येवंक ना. ताचो काका संतोष नाऊ फाले हांणी दोडामार्ग पुलिशेंत 23/05/2022 दिसा कागाळ केली. आतां दोन वर्सां उपरांत तिगांनी ताचो खून केल्ल्याची म्हायती पुलिसांच्या कानार पडली. तिगां मदल्या अनिकेत ह्या दुबावीतान बार्रांत सोऱ्याचे नशेंत आसतना ह्या खुना विशीं कोणाक तरी सांगलें. ही बातमी पुलिसांच्या खबऱ्यान पुलिसांक कळयली. मागीर ताच्या संपर्कांत कोण- कोण आसात, ताचेर नदर दवरून पुलिसांनी तांचे कडेन चवकशी केली आनी खात्री जातकच वयल्या तिगांक धरले.
ताचे पयलीं 21/08/2024 दिसा पुलिसांनी गुन्यांव नोंद केलो. दुसरेच दीस तिगांकूय धरले. हातूंतलो एक गोंयांत पळून येतालो, तर हेर दोग तांच्या घरांतूच मेळ्ळे. दुबावीत हे उमेशाचे इश्ट. तांणी उमेशाक आपले वांगडा पिवपाक व्हेलो. ताका सोरो चडटकच बरोच बडयलो. तातूंत ताका मरण आयलें. उपरांत ताची कूड कानालाच्या उदकांत उडयली अशें पुलिसांक सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
