भांगरभूंय | प्रतिनिधी
पणजी : दोडामार्गच्या नाक्यार पर्यटकां कडल्यान पावती दिनासतना पयशे घेवपी तीन पुलिसांचेर कारवाय करची अशी मागणी ॲड. संतोष मळवीकार हांणी केली. बिरेस्तारा तांणी पणजे पत्रकार परिशद घेवन ही मागणी केली. ताचे पयलीं तांणी पयशे घेवपी पुलिसां आड कागाळ दाखल केली. ह्या नाक्यावेल्या पुलीस पर्यटकांक फटयतात असो आरोपूय तांणी ह्या वेळार केलो. हालींच हे घडणुकेचो व्हिडियो व्हायरल जाल्लो.
मळवीकार हांणी सांगलें, आयतारा दनपरां आमी दोडामार्गच्यान गोंयांत प्रवेश केलो तेन्ना नाक्यावेल्या पुलिसांनी आमकां आडयले.
म्हजे कडेन गाडयेचीं सगलीं कागदपत्रां आशिल्लीं. मात वाहन परवानो नाशिल्लो. तो गडबडींत घरा उरलो. हांव म्हजी चूक मान्य करून दंड भरपाचे थारायलें. पुलिसांनी म्हजे कडल्यान पांचशें रुपया घेतले. मात पावती मागली तेन्ना, ती मेळची ना अशें सांगलें. ह्या पुलिसांनी नेमप्लेटूय लावंक नाशिल्ली.
त्याच दिसा रातच्या आठ वरांचेर ह्या मार्गान आमी गोंयच्यान भायर सरताले. तेन्ना पुलिसांनी कर्नाटकाचें एक वाहन आडयलें. वाहनांतल्या मनशांक मारपेटूय केली. ह्यो दोनूय घडणुको आमी रेकॉर्ड केल्यो. आमी ते पणजी पुलिसांक पुरावे म्हणून दितले. गोंय पुलिसांनी अश्या पुलिसांचेर खर कारवाय करपाक जाय. गोंयचे विदेशी पर्यटक उणे जातात. जाल्यार पुलिसां वतीन देशी पर्यटकांकूय त्रास दितात. असले प्रकार बंद जावपाक जाय, अशें मळवीकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
