भांगरभूंय | प्रतिनिधी
केंद्रीय गृहमंत्रालयाचे गोंयच्या जिल्होधिकाऱ्यांक आदेश
भांगरभूंय I प्रतिनिधी
पणजी : गोंयांतल्या दोट्टी नागरिकत्वाच्या प्रकरणाची खोलायेन अानी पारदर्शक चवकशी करून दोन वर्सांत अहवाल सादर करपाचो आदेश केंद्रीय गृहमंत्रालयान गोंयांतल्या उत्तर आनी दक्षीण जिल्होधिकाऱ्यांक दिला. गृहमंत्रालयाचे जोड सचीव सुमंत सिंग हांणी हे विशींचो आदेश जारी केला. गृहमंत्रालयाच्या आदेशाक लागून दोट्टी नागरिकत्वाचो मुद्दो परतून तकली वयर काडपाची शक्यताय आसा.
भारतीय नागरिकत्व कायदो 2009 च्या नेम 9 प्रमाण जिल्होधिकाऱ्यांनी नागरिकत्वा विशींची चवकशी करप, सुनावण्यो घेवप म्हत्वाचें आसता. तशेंच हे विशींचे अधिकार लेगीत जिल्होधिकाऱ्यांक आसतात. त्या अधिकारा प्रमाण, गोंयांतल्या दोट्टी नागरिकत्वा विशीं खोलायेन आनी पारदर्शक चवकशी करून केंद्र सरकाराक फुडल्या दोन वर्सांत शिफारशी सादर करात, असो आदेश गृहमंत्रालयान उत्तर आनी दक्षीण गोंयच्या जिल्होधिकाऱ्यांक दिला.
नागरिकत्व कायद्या प्रमाण दोट्टी नागरिकत्व प्रकरणांची चवकशी करपा खातीर जिल्होधिकाऱ्यांनी पयलीं हे विशींची जायरात प्रसिद्ध करची. तातूंत दोट्टी नागरिकत्व घेतिल्ल्यांक दावे सादर करपाच्यो सुचोवण्यो करच्यो. ते उपरांत सुनावण्यो घेवन अशा प्रकरणांची खोलायेन अानी पारदर्शक रितीन चवकशी करची. ते विशींचो अहवाल केंद्रीय गृहमंत्रालयाक धाडचो. त्यो शिफारशी स्विकारच्यो वा ना हाचो निर्णय केंद्र सरकार घेतलें, अशें सुमंत सिंग हांणी आदेशांत म्हणलां.
मजगतीं, नागरिकत्व कायदो 1955 प्रमाण भारतांत ‘एकच नागरिकत्व’ मेळटा. कायद्या प्रमाण भारताचें नागरिकत्व आशिल्ली व्यक्ती हेर खंयच्याच देशाचो नागरीक जावपाक शकना. अशें आसतना गोंयांत जायत्या जाणां कडेन दोट्टी नागरिकत्व आसा. ताची जायतीं प्रकरणां फाटल्या कांय वर्सांत उक्ताडार आयल्यात.
गोंयकारांक पुर्तुगीज पासपोर्ट मेळप सोंपे जाल्ल्यान जायते जाण थंय यो-वच करपा खातीर वा कायमचो राबितो करपा खातीर पुर्तुगीज नागरिकत्व मेळयतात. पूण त्या देशाचो पासपोर्ट मेळ्ळे उपरातं भारतीय पासपोर्ट कार्यालयांत जमा करिनात. ताका लागून जायत्या जाणां कडेन दोन-दोन पासपोर्ट आसून संबंदितां कडेन दोट्टी नागरिकत्व आसा. अशा प्रकरणांचेर नियंत्रण दवरपाक केंद्रीय गृहमंत्रालयान गोंयांतल्या उत्तर आनी दक्षीण गोंय जिल्होधिकाऱ्यांक हे विशींचो अहवाल सादर करपाचे आदेश दिल्ल्याचो दुबाव गोंयांतले नागरीक उक्तायतात.
दोट्टी नागरिकत्वाचीं जायतीं प्रकरणां
नागरिकत्व कायदो 1955 प्रमाण भारतांत ‘एकच नागरिकत्व’ मेळटा. कायद्या प्रमाण भारताचें नागरिकत्व आशिल्ली व्यक्ती हेर खंयच्याच देशाचो नागरीक जावपाक शकना. अशें आसतना गोंयांत जायत्या जाणां कडेन दोट्टी नागरिकत्व आसा. ताची जायतीं प्रकरणां फाटल्या कांय वर्सांत उक्ताडार आयल्यात.गोंयकारांक पुर्तुगीज पासपोर्ट मेळप सोंपे जाल्ल्यान जायते जाण थंय यो-वच करपा खातीर वा कायमचो राबितो करपा खातीर पुर्तुगीज नागरिकत्व मेळयतात. पूण त्या देशाचो पासपोर्ट मेळ्ळे उपरातं भारतीय पासपोर्ट कार्यालयांत जमा करिनात. ताका लागून जायत्या जाणां कडेन दोन-दोन पासपोर्ट आसून संबंदितां कडेन दोट्टी नागरिकत्व आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
