भांगरभूंय | प्रतिनिधी
म्हापशें ः हळदोण्यां शाळेंतल्या दोन भुरग्यां मदीं झगडें पेटलें. झगडें सोडोवपी मनशानूच जाब विचारिल्ल्याच्या कारणावेल्यान एका चल्या सयत ताच्या आज्याकूय बडयलो. हे विशीं म्हापशें पुलिसांनी अजित जल्मी (५४, रा. हळदोणां) हाका अटक केली.
ही घडणूक सोमारा साजेवेळार सुमार ५.३० वरांचेर घडली. शाळा सुटले उपरांत यत्ता ६वींत शिकपी दोग १० वर्सां पिरायेचे शाळेंत शिकपी भुरगे आपापले मदीं झगडटाले. ह्या वेळार आपल्या भुरग्याक शाळेंतल्यान व्हरपाक आयिल्लो अजित जल्मी हांणी ह्या दोगांय भुरग्यांचें झगडें सोडोवपाचो यत्न केलो. ह्या वेळार एका भुरग्याचो आजो सिवील फर्नांडीस (६१) हांचे सयत त्या ल्हान भुरग्यान जल्मी हांकां जाप विचारली. उपरांत तांचे मदीं वाद जालो.
उपरांत हे घडणुकेची म्हायती मेळटांच सगल्यांक पुलिसांनी पुलीस स्टेशनाचेर हाडलीं. उपरां बेनेडिटा मार्टीन हांणी पुलिशेंत आपलो बापूय सिवील फर्नांडीस आनी पुताक मारपेट केल्ल्याची कागाळ अजित जल्मी हांचे आड केली.
ते प्रमाण पुलिसांनी भा.न्या.सं.च्या कलम ११८(१) आनी गोंय बाल कायद्या खाला गुन्यांव नोंद करून अटक केली. फुडलो तपास पुलीस निरीक्षक निखील पालेकार हांच्या मार्गदर्शना खाला उपनिरीक्षक बाबलो परब हे करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
