भांगरभूंय | प्रतिनिधी
नगरसेवकांचो आक्षेप; म्हापशें पालिका मंडळांत बसका
म्हापशें: पालिका मंडळाचे बसकेंत नगरसेवकांच्या विरोधाक लागून रगताच्या नात्या प्रमाण एका नगरसेवकाच्या नांवार बाजारपेठेंतल्या दुकानाचे भाडेकार कबलातपत्र हस्तांतरीत करपाचो तशेंच एका नगरसेवकाच्या सोयऱ्याच्या पोरण्या बाजारपेठेंतल्या दुकानाची 8.63 लाख रुपया थकबाकी माफ करपाचो प्रस्ताव भायरायलो.
नगराध्यक्षा प्रिया मिशाळ हांचे अध्यक्षताये खाला जाल्ले पालिका मंडळाचे बसकेंत ह्या दोनूय प्रस्तावांक उपनगराध्यक्ष प्रकाश भिवशेट आनी नगरसेवक विराज फडके हांचे सयत हेरांनी आक्षेप घेतलो.
दुकान क्रमांक 75/66 भाडेकार गोपाळ रावूळ हांच्या नांवा वेलें कबलातपत्र नगरसेवक साईनाथ रावूळ हांच्या नांवान हस्तांतरीत करपाचो प्रस्ताव नगराध्यक्षांनी बसकेंत मान्यताये खातीर दवरलो. ताचेर फाटलीं पांच स वर्सा खूबश्या कबलातपत्र हस्तांतरणाचे अर्ज पालिके कडेन पडून आसात. ताचेर निर्णय अजून जाल्लो ना, आनी फक्त 15 दिसां पयलीं आयिल्ल्या ह्या अर्जाचो प्रस्ताव मंजुरे खातीर कसो हाडलो. पयलींचे प्रलंबीत अर्ज पयली घेवचे आनी उपरांतूच ह्या अर्जाचेर विचार करचो. तशेंच हें दुकान मूळ भाडेकारान कांय वर्सां पयलीं भायले भायर तिसऱ्या मनशाक विकिल्लें. ताचेर चवकशी करची अशी मागणी भिवशेट हांणी केली.
उपरांत विराज फडके आनी हेर नगरसेवकांनी ह्या प्रस्तावाक हरकत घेतली तेन्ना हो प्रस्ताव कुशीक दवरतात अशी जाप नगराध्यक्षांनी दिली.
पोरण्या बाजारपेठेंतल्या एलआयजी इमारतींतल्या 44/2 क्रमांकाच्या दुकानाचें भाडें माफ करपाची विनंती भाडेकार दुकानदार अमिता नार्वेंकार हांणी पालिके कडेन केल्ली. ही थकबाकी 8 लाख 63 हजार रुपया आशिल्ली. हो अर्ज चर्चे खातीर नगराध्यक्षांनी दवरलो तेन्ना हें भाडें माफ करपा खातीर नगरसेवकांनी विरोध केलो.
उपनगराध्यक्ष भिवशेट हांणी ह्या प्रस्तावाक हरकत घेवन कायद्या प्रमाण पालिका मंडळाक भाड्याची रक्कम माफ करपाचो अधिकार ना. दुकानाचें पाखें आनी इमारतीच्या सोकपिठाक लागिल्ली गळटी हाका लागून दुकान बंद आशिल्ल्याचें जें कारण दिलां तें विस्वासाचें ना. तशेंच वयली गजाल संबंदितान पालिकेचे नदरेक हाडून दिवंक नाशिल्ली. तशेंच ही भाडेंवाड टाळपा खातीर दुकान पालिकेक परत करचें. ताका लागून भाडें माफीचो प्रस्न उप्रासचो ना अशी सुचोवणी तांणी केली. ताचे उपरांत हो प्रस्ताव नामंजूर केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
