भांगरभूंय | प्रतिनिधी
बेतूल सनसेट पॉयंटार घडली घडणूक
मडगांव: बेतूल सनसेट पॉयंटार कुंकळ्ळी पुलीस स्टेशनाचे कॉन्स्टेबल अनूप कावरेंकार आनी साईराज नायक हांकां फातरांनी, हातांनी आनी खोंटींनी मारपेट केली. ह्या प्रकरणांत कुंकळ्ळी पुलिसांनी दुबावीत जेबियार डंगडंग, सुरेश हरिया, राहुल किसन, अमीत लोहरा (सगले मूळ झारखंड) हांकां अटक केल्या.
बेतूल हांगासरल्या पारूल युनिव्हर्सिटी कुशीक सनसेट पॉयंटार ही घडणूक शेनवारा सांजवेळा चार वरांच्या सुमाराक घडली. जेबियार डंगडंग (रा. सद्या वार्का, मूळ झारखंड), सुरेश हरिया, राहुल किसन, अमीत लोहरा (रा. सद्या बेतूल, मूळ झारखंड) हांचे सयत आनीक दोगां अनवळख्यांनी कुंकळ्ळी पुलीस स्टेशनाचे कॉन्स्टेबल अनूप कावरेंकार आनी साईराज नायक हांचेर फातर शेंवटून मारले. उपरांत हातांनी आनी खोंटीनी मारपेट केली. हे मारपेटींत अनूप कावरेंकार हाचे तकले सयत कुडीच्या हेर भागांचेर जखमो जाल्यात.
ह्या प्रकरणांत कुंकळ्ळी पुलिसांनी चारूय दुबावितांचेर बेकायदो जमाव करप, दंगो करप, खुनाचो यत्न करप, सरकारी कर्मचाऱ्यांच्या कामांत आडमेळीं हाडून तांचेर हल्लो करप ह्या कलमां खाला गुन्यांव नोंद करून अटक केल्या. ह्या प्रकरणाचो फुडलो तपास पुलीस उपनिरिक्षक किशोर वेळीप करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
