भांगरभूंय | प्रतिनिधी
मुख्यमंत्रीः कागाळ करचे खातीर नवी वेवस्था हाडटले
भांगरभूंय । प्रतिनिधी
पणजीः गोंयांत दोंगर कापणी संबंदांत कागाळ करचे खातीर नवी वेवस्था तयार करतले. हातूंत जिल्होधिकारी आनी पुलीस खातें एकवटान काम करतले. दोंगर कापणी बंद जाली जाल्यार पालसणां कोसळपाचे प्रकार उणे जातले, अशें मत मुख्यमंत्री डॉ. प्रमोद सावंत हांणी उक्तायलें. बिरेस्तारा ते विधानसभेंत उलयताले. हे विशीं आमदार गणेश गांवकार आनी हेर वांगड्यांनी लक्षवेधी सुचोवणी उपस्थीत केल्ली.
मुख्यमंत्र्यान सांगलें, वायनाडची घडणूक धोक्याची घाट आसा. अशें जावचें न्हय हे खातीर आमी आदींच पावसां उखलिल्लीं. फाटल्या सरकाराच्या काळांत जैव विविधता मंडळान गोंयांत पालसणां कोसळपाची शक्यताय आशिल्ल्या वाठारां विशीं एक अहवाल तयार केल्लो. त्या अहवाला प्रमाण अती उटंगाराचो पावस, जमीन देंवतेची अस्थिरता आनी हेर भुगेलीक कारणांक लागून गोंयांत पालसणां कोसळपाच्यो घडणुको घडिल्ल्यो. अश्या वाठारांचेर सरकार गरजेच्या त्या संस्थां कडल्यान सर्वेक्षण करतलें.
गोंयांतल्या पश्चीम घांट लागसारच्या कांय वाठारां सयत अंतर्गत वाठारांत पालसणमां कोसळपाची शक्यताय आशिल्ल्याचें अहवालांत नमूद केलां. ते प्रमाण थंयची स्थिरताय कायम राखप गरजेचें आसा. विधानसभा अधिवेशन सोंपले उपरांत आपत्ती वेवस्थापन आनी हेर संबंदीत खात्यांची बसका घेतले. तातूंत ह्या अहवालाचो परतून नियाळ घेतले. तशेंच रान, उदकास्रोत आनी पर्यावरण खात्याक हे विशीं अहवालांत सुचयिल्ले निर्देश परतून दितले, अशें मुख्यमंत्री डॉ. सावंत हांणी सांगलें. महसूल मंत्री बाबूश मोन्सेरात हांणी सांगलें, इस्रोन 2023 त देशभरांतल्या पालसणां कोसळपी वाठारांचो अॅटलास तयार केल्लो. तातूंत वट्ट 147 वाठारांचो आस्पाव आशिल्लो. तातूंत उत्तर गोंय 111 वे जाल्यार दक्षीण गोंय 121 वे सुनवातेर आसा. जाल्यार वायनाड 13 वे सुवातेर आसा. आपत्ती वेवस्थापन प्राधिकरणा वतीन नगर नियोजन खातें, तशेंच दोनूय जिल्हो विकास प्राधिकरणाक नव्या उदरगतीच्या कामांची परवानगी दितना गरजेच्या सगळ्या नेमांची खरसाणीन अंमलबजावणी करपा विशींची सुचोवणी दितले.
‘देखभाली खातीर सरकार करता उपाय येवजण’
जैवीक नदरेन संवेदनशील आशिल्ल्या वा 25 टक्क्यां परस चड देंवत्यो आशिल्ल्या दोंगराळ वाठारांत पासलण कोसळपाची शक्यताय चड आसता. ते खातीर अश्या वाठारांची योग्य देखभाल करप गरजेचें आसा. सरकार ते खातीर गरजेच्यो उपाय येवजण करता, अशें मुख्यमंत्री डॉ. प्रमोद सावंत हांणी सांगलें.
गाडगीळ अहवाल परतून तपासतलेः मोन्सेरात
पालसणां कोसळपाच्यो घडणुको आडावपा खातीर उदकास्रोत खात्याक प्रतिबंध उपाय सुचोवण्या विशीं अभ्यास करपाची विनवणी करतले. तशेंच अश्या वाठारांचो अभ्यास करपा खातीर तज्ञ एजन्सी नेमपाची विचार चल्ला. गरज पडल्यार गाडगीळ समितीन दिल्लो अहवाल परतून तपासून तातूंतल्यो गरजेच्यो प्रतिबंधात्मक उपाय येवजण्यो करतले, अशें मंत्री बाबूश मोन्सेरात हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
