भांगरभूंय | प्रतिनिधी
न्या. फेर्दीन रिबेलो : नियाळ करून निर्णय घेतले : मुख्यमंत्री सावंत
पणजीः नगर नियोजकान दोंगराच्या बाह्यरेखेचे नेम मोडपी दोंगर कापणी विशींचें परिपत्रक फाटीं घेवन जी मान्यताय ह्या परिपत्रका वरवीं दिल्या ताचेर फेरविचार करचो, अशी मागणी करून ह्या परिपत्रकाक लागून रानांचेर संकश्ट येतलें, अशें न्या. फेर्दिन रिबेलो हांणी मुख्यमंत्री डॉ प्रमोद सावंत हांकां सांगलें. हे विशीं नियाळ घेवन निर्णय घेतले, अशी जाप मुख्यमंत्र्यान दिल्या.
न्यायाधीश फेर्दीन रिबेलो हांणी मुख्यमंत्र्याची भेट घेतले उपरांत ते पत्रकारां कडेन उलयताले. आमी मुख्यमंत्र्याक आमचे १० मुद्दे दिल्यात आनी हे अंमलात हाडूं येतात अशें मुख्यमंत्र्याक सांगिल्ल्याचें रिबेलो हांणी म्हणलें.
२३ नोव्हेंबराक नगर नियोजकान दोंगर कातरपा विशीं जारी केल्ल्या परिपत्रकाचो मुखेल विशय तांचे मुखार मांडून तें परिपत्रक फाटीं घेवपाक सांगलें. ह्या परिपत्रकाचे आदारार दोंगराचे चडटेर जीं रानां आसात तांची बाह्यरेखा बदलपाक नगर नियोजन खातें मान्यताय दिता आनी नगर नियोजकाक हें परिपत्रक काडपाक कसलोच हक्क ना, अशें रिबेलो हांणी सांगलें.
भारतीय सर्वेक्षक जनरलान बाह्यरेखा आराखडो तयार केला. मात तो कुशीक दवरून खाजगी आर्किटेक्टांनी आपले आराखडे तयार केल्यात आनी तांच्या आदाराचेर नगर नियोजन खातें दाखले दिता. देखून हें परिपत्रक बेगीनूच रद्द करचें आनी सर्वेक्षक जनरल हांणी तयार केल्ल्या बाह्यरेखा आराखड्याच्या आदाराचेर जी परवानगी दिल्या ताचेर फेरविचार करून सगल्या बांदकामांक स्थगिती दिवची, अशी मागणी न्या. रिबेलो हांणी केली.
मुख्यमंत्र्यान पासियेंस काडून आमचें आयकून घेतलें. आमकां कितें म्हणपाचें आसा, तें तांकां समजला. आमी तांकां परिपत्रक आनी कायदो दाखोवन सांगला, कलम १७ अ सकयल नगर नियोजकांक हें परिपत्रक जारी करपाचो कसलोच हक्क ना. मुख्यमंत्र्याक आमचो मुद्दो कळ्ळा आनी आतां तांच्या निर्णयाची आमी वाट पळयतात, अशें रिबेलो हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
