भांगरभूंय | प्रतिनिधी
भांगरभूंय । पत्रक
मडगांवः दैवज्ञ समाज कला आनी संस्कृतीची जपणूक करपी समाज आसा. पारंपरीक भांगरा कारागिरींत आपली वेगळी वळख तयार करपी ह्या समाजा वांगडा हेर समाजा कडेन तांची नाळ बांदल्ली आसा. मडगांवचो दैवज्ञ समाज सगल्या समाजांक उर्जा दिवपी एकसुरो समाज आसा. आपल्या समाजांतल्या गुणेस्त विद्यार्थ्यां वांगडा हेर समाजांतल्या प्रज्ञावंत विद्यार्थ्यांचो भोवमान करपाक तो विसरना अशें प्राचार्य अनिल सामंत हांणी सांगलें. मडगांव दैवज्ञ समजा वतीन आयोजीत केल्ले विद्यार्थी भोवमान कार्यावळींत मुखेल सोयरे म्हणून ते उलयताले.
कार्यावळीक सोयरे म्हणून ज्येश्ठ समाज सेवक आनी देवकी रामकृष्ण रायकार चेरीटेबल ट्रस्टाचो तशेंच दैवज्ञ समाजाचो आदलो अध्यक्ष मनोहर रायकर माचयेर आशिल्ले. तांणी आपल्या ट्रस्टा वतीन फुडल्या धा वर्सां खातीर 1 लाख रुपयांचो निधी शिश्यवृत्ती म्हणून दिवपाचें ह्या वेळार जाहीर केलें.
कालिका म्हयन्याळ्याचो संपादक प्रा. हरिश्चंद्र नागवेकार हांणी भुरग्यांक फकत दोतोर वा इंजिनियर ह्या मळा वांगडाच दुसरें वेवसायीक कार्यमळ वेंचूनक काडपाचो सल्लो दिलो. भांगरा कारागिरीचें शिक्षण जागतिकीकरणाच्या सध्या तेंपार दैवज्ञांक साल्वार करपाक शकता अशें दैवज्ञ संघाचो कार्याध्यक्ष गौरीश वेर्णेकार हांणी सांगलें. दैवज्ञ समाजांतल्या भुरग्यांक शिकपा खातीर अर्थीक अडचण येवची न्हय हे खातीर दैवज्ञ समाज निश्चीत तजवीज करतलो. समाजाच्या बऱ्याचें काम करपाक आमी बांदिल्ले आसात, अशें समाजाचो अध्यक्ष रामराव लोटलीकार हांणी सांगलें.
कार्यावळींत अखिलेश नागवेकार, विश्वेश नागवेकार,शेफाली लोटलीकार, शर्वणी लोटलीकार, मिथाली रायकार, गरिमा रायकार,निशा सांगोडकार मनेश रेवणकार, पूर्वा लोटलीकार, लिशा नागवेकार, मनन चोडणकार, सारा वेर्णेकार, शुभम उसापकार, भाग्यश्री रायकार हांचो भोवमान केलो. तशेंच राज्य पांवड्यार शालांत परीक्षेत बरें गुण घेवन पासा जाल्ल्या तीन विद्यार्थ्यांचो तांच्या आवय-बापाय वांगडा भोवमान केलो. सिया गोवेकार (25 हजार), निशांत वेर्णेकार (25 हजार), प्रेमा भट (15 हजार), अश्वेक मुद्रास (10 हजार) हांका रोख इनामां भेटयलीं.
प्राचार्य अनिल सामंत हाचो मडगांव दैवज्ञ समजा वतीन भोवमान केलो. सुरवेक रामराव लोटलीकार हांणी प्रास्तावीक करून सगल्यांक येवकार दिलो. सूत्रसंचालन स्नेहलता लोटलीकार आनी पवन रांगणेकार हांणी केले. संसथेचो सचीव दिलीप लोटलीकार हांणी निमाणे उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
