देश सोडात, नाजाल्यार…

भांगरभूंय | प्रतिनिधी

संवसारांतल्या विकसीत देशांनी सगल्या देशांचे लोक नोकरी, वेवसायाच्या निमतान रावतात. खास करून अमेरिका, इंग्लंड, आॅस्ट्रेलिया, कॅनडा, जर्मनींत!! चडशे कायदेशीर मार्गान वतात, पूण बेकायदेशीर पद्दतीन वचप्यांचोय आंकडो उणो ना. कांय जाण त्या देशाक सगल्यां मुखार अक्षरशा वायट उतरां दितात, पूण आपल्या भुरग्यांक शिक्षण, नोकरे खातीर गुपचूप थंय धाडटात. खास करून अमेरिकेक वचपी लोकांचो आंकडो चड आसा. चीन, भारताचे लोक चड. आमच्या कांय भारतीय भावांचें तर अमेरिकेक वचून रावप हें सपन. ते खातीर कितेंय करपाची तांची तयारी. पूण सगल्यांक संद मेळना. मागीर तातूंतले थोडे शिक्षणाचें निमित्त करून थंय बेकायदेशीर पद्दतीन रावतात. हातूंत पाकिस्तान, बांग्लादेश तशेंच आशिया, आफ्रिकेंतले हेर देश आसात. हाचें फाटलें कारण म्हणल्यार गरिबी, बेकारी. थोडे चड पगाराच्या आशेन वतात. मात आतां अमेरिकेचे अध्यक्ष डोनाल्ड ट्रम्प हे जादुगारान पोतयेंतल्या एकेक वस्तू काडच्यो तशे एकेक आदेश भायर काडीत आसात. ते थंयच्या भायल्या नागरिकांक मारक थारपाची चड शक्यताय. हातूंत आमची भारतीय भाव- भयणां आसतलींच.
अमेरिकेच्या गृह सुरक्षा विभागान सगल्या भायल्यांनी सरकारा कडेन नांव नोंदणी करची, अशी शिटकावणी दिल्या. 30 दिसां परस चड काळ अमेरिकेंत रावप्यांक आपली म्हायती सरकाराक दिवची पडटली. उपरांत कोण सांपडल्यार ताका 86 हजार ते 4.3 लाख रुपया (भारतीय चलनांत) दंड जातलो, ताचे भायर बंदखणूय आसतलीच. 86 हजार दंड हो दर दिसा भरपाचो. सोशल मिडियाचेर शिटकावणेची पोस्ट घालतना गृह सुरक्षा विभागान अध्यक्ष डोनाल्ड ट्रम्प हांकांय टॅग केल्यात. ‘बेकायदेशीर विदेशी लोकांक संदेश’ ह्या माथाळ्या खालच्या ह्या पोस्टांत सरकारी अधिकाऱ्यांच्या लेखी परवानगे बगर रावपी विदेशी नागरिकांनी आपूण जावन हद्दपार जावचें, अशें म्हणलां. तशें केल्यार कितें फायदे आसात, तेंय सांगलां. ‘‘स्वता जावन वचात. विमान, बोट खंयच्याय मार्गान वचात. जर तुमी स्वता जावन वतात जाल्यार हांगा जोडिल्लो सगलो पयलो तुमचे कडेनूच दवरात. तुमी गेल्यार तुमकां फुडाराक कायदेशीर मार्गान हांगा येवपाची पयली संद मेळटली. वचपाक पयशे नात, जाल्यार खाशेल्या विमानांनी सवाय भितर वचात.’’ ही मोहीम रोखडीच परत सुरू जातली. थोड्यांक हाचे पयलीं खाशेल्या विमानांनी धाडल्यात. जे कोण अमेरिकेचेर मायभुंये परस चड मोग करतात, तांचे खातीर गोल्ड कार्ड येवजण सुरू जातली. 44 कोटी रु. भरपाचे आनी अमेरिकेचो नागरीक जावपाचो. 10 लाख लोकांक ही संद मेळटली. संवसारांतल्या साडेतीन कोटी लोकांक हें शक्य आसा, असो दावोय अमेरिकेन केला. हो सगलो पयसो अमेरिकेचें रीण उणें करपाक वापरतले खंय.
अमेरिकेच्या ह्या निर्णयाक भारतीयांक व्हडलो फटको बसतलो, तरीय हाका विरोध करपाक मेळना. बेकायदेशीर पद्दतीन रावप हें चुकीचें. आमच्या देशांत पसून शेजारी देशांतले हजारांनी लोक रावतात. थोडे लिपचोरयां. तातूंत कांय लोकांक आमचो विरोध आसा. थोडे आमकां जाय. खंयच्याय देशांतल्यान ते हांगा आयल्यार आमी तांकां नागरिकत्व पसून दितात. अर्थांत बेकायदेशीर पद्दतीन देशांत घुसपी आनी हांगा येवन रावपी, मागीर तो पोट भरपा खातीर काय आसना, ताका थारो दिवप चुकीचें. अमेरिकेंत गुपचूप रावपीच न्हय, तर व्हिसा घेवन गेल्ल्या लोकांकूय ट्रम्प सरकाराचो निर्णय माल वतलो. एच -1 बी व्हिसाचेर गेल्ल्यांची नोकरी गेली जाल्यार ताका थंय रावपाक मेळना. थोड्या दिसां भितर नवी नोकरी मेळ्ळी जाल्यार सुटलो, ना तर सुटकेस भर आनी चल परत!! विद्यार्थी परवान्याचेर गेल्लेय शिक्षण पुराय करून थंय नोकरी करतात वा नोकरी मेळटली म्हूण रावतात. तांकांय नव्या निर्णयाचो धपको बसुये.
ग्रीन कार्ड मेळ्ळें जाल्यारुच कायमचो अमेरिकी नागरीक जातलो. हांगा नोकरी सोदपाक वा मुलाखती दिवपाक थोडे बी 1, बी 2 व्हिसाचेर वतात. मात तांकां थंय काम करपाक मेळना. एच 1 बी व्हिसा आतां कुशळटाय आशिल्ल्यांकूच दितात. दोतोर, अभियंते, आयटी तज्ञांक बी. कलाकार, खेळगडे, अतिसामान्य बुद्दी, कुशळटाय आशिल्ल्या व्यक्तींकूय व्हिसा मेळटात. अमेरिका असल्या लोकांक मुद्दाम आपयतली, पूण हेरांक पयलीं सारकी सोंसून घेवची ना. तांकां फायद्याचे नात, तांकां सगल्यांक ती धांवडायतली, अशें दिसता. भारतीय आनी इझ्रायलींनी अमेरिकेक खांद मारला. तो काडल्यार ताचो धपको आपणाक बसतलो, हाची जाणीव अमेरिकेक आसतलीच. पूण, ती केन्ना न्हय, इतली कडक जाल्या. बेकायदेशीर पद्दतीन रावपी, गुन्यांवकारी कारवायो करप्यांक अटक करून ख्यास्त दिवंक जाय, ताच्या देशांत धाडपाक जाय. पूण शिक्षणा खातीर गेल्ल्या, नोकरी सोदपी लोकां कडेन थोडे सहानुभूतीन पळोवं जाय, अशें बऱ्याच लोकांक दिसता. मात आतां तरसाद वावुडपाच्या नेटार आशिल्ल्या ट्रम्पाक हें सांगतलो कोण? ‘दाय, आमचो गांवूच बरो’ अशें म्हणपाचो वेळ आतां सगल्यांचेरूच येतलो.