भांगरभूंय | प्रतिनिधी
सोनिया सिरसाट, मंदाकिनी त्रिवेदीच्या नृत्यान रसिकांचेर घालो मोनेळ
पणजी: जॉर्जियातले गुरजानी समूह, सोनिया सिरसाट हांणी म्हणिल्लीं पुर्तुगेज पदां आनी मंदाकिनी त्रिवेदी हांच्या मोहिनीअट्टम नृत्यान सातव्या केतवन महोत्सवांत रसिकांचेर मोनेळ घालो. गोंया सयत, पुर्तुगाल, जॉर्जिया आनी हेर वाठारांतलीं पदां आनी संगिताचो आनंद रसिकांनी घेतलो. कार्यावळीक रसिकांचो बरो प्रतिसाद मेळ्ळो.
पोरणें गोंया सेंट आगुस्तीन टॉवर वाठारांत सातवो केतवन संगीत महोत्सव शुक्रारा रातीं जालो. जॉर्जियाचे भारतांतले उच्चायुक्त वखतांग जोशविल्ली, जॉर्जियाचे गोंयचे कौन्सूल आकाश तिंबलो, शो हावज इवेंट कंपनीचे ओमार हैदर आनी हेर मानेस्त कार्यावळीक हाजीर आशिल्ले.
प्रुडंट नॅटवर्कान जॉर्जियाचे सांस्कृतीक मंत्रालय आनी भारतीय सांस्कृतीक संबंद परिशद (आयसीसीआर) हांच्या पालवान कार्यावळीचें आयोजन केल्लें.
नारीशक्तीचें प्राबल्य आनी गुणाचेर उजवाड घालपी तत्वम, तत्वम शिवगंगा तत्वम…. ह्या नृत्यान जाली. उपरांत केरळांतले मोहिनीअट्टम नृत्या वरवीं तीन जशधुंद नेत्रा हो देवी श्लोक सादर केलो.
जॉर्जियांतले गुरजानी लोककला पंगडान जॉर्जियांतले लोककलेचेर आदारीत संगीत सादर केलें. जॉर्जियांत 1967 वर्सा ह्या पंगडाची स्थापणूक जाली. निमाणें गोंयच्या सोनिया सिरसाट हांणी जॉर्जिया, पुर्तुगाल आनी गोंयच्या संगिताचेर आदारीत एका परस एक सरस परंपरेचेर आदारीत पदां सादर केलीं. तिका नुवेंच्या रिशाना गोम्स, रिहाना गोम्स आनी हेरांनी सांगात दिलो. बिना दतवानी हांणी कार्यावळीचें सुत्रसंचालन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
