देश म्हत्वाचो, जात न्हयः सुहासबुवा वझे

भांगरभूंय | प्रतिनिधी

पैंगिणी किर्तन प्रशिक्षण शिबीर उमेदीन: 98 टक्के चलयांचो आस्पाव

भांगरभूंय । प्रतिनिधी

काणकोणः सुशिक्षीत म्हणल्यार सुसंस्कृत समाज न्हय. संवसारांत भारता सारको दुसरो देश ना, हिंदू धर्मा सारको धर्म ना. देश म्हत्वाचो, जात म्हत्वाची न्हय, अशें किर्तनकार सुहासबुवा वझे हांणी सांगलें.

महालवाडो पैंगीणी किर्तन प्रशिक्षण वर्गाच्या उक्तावण सुवाळ्यांत वझे प्रशिक्षक म्हूण उलयताले. गोमंतक संत मंडळ किर्तन म्हाविद्यालय आनी महालवाडो पैंगीणच्या श्री नृसिंह परशुराम देवस्थान समिती हांच्या जोडपालवान महालवाड्या वयल्या श्री नृसिंह परशुराम मंदिरांत आयोजीत केल्ल्या दोन दिसांच्या किर्तन प्रशिक्षण शिबिराचें उक्तावण काणकोणचे आमदार तशेंच सभापती रमेश तवडकार हांचे हस्तुकीं उक्तावण जालें. ह्या वेळार वझे आनी सभापती तवडकार हांचे सयत पैंगीणची सरपंच सविता तवडकार, उपसरपंच सुनील पैंगीणकार, ज्येश्ठ पत्रकार अजीत पैंगीणकार, श्री नृसिंह परशुराम देवस्थान समितीचे अध्यक्ष ज्ञानानंद प्रभुगांवकार हाजीर आशिल्ले.

भोवजन समाजांतल्यान सध्या शेंकड्यांनी किर्तनकार तयार जातात. हे मुखार ह्या म्हालांत पांच दिसांचें प्रशिक्षण शिबीर घेतले. अशे तरेचें प्रशिक्षण शिबीर काणकोणां पयलेच खेपे जाता. ह्या शिबिरांत 25 जाणांनी वांटो घेतला. तातूंत 98 टक्के चलयो आसात, अशी म्हायती वझे हांणी दिली.

किर्तन हें समाज शिक्षण आनी समाज प्रबोधनाचें बरें साधन. आदर्श युवा संघाच्या फुडल्या लोकोत्सवांत एक दीस खास किर्तना खातीर राखून दवरतले, अशें सभापती रमेश तवडकार हांणी सांगलें.

मनशाचे बदलिल्ले शैलीक लागून पुराण, किर्तना कडेन लोकांनी फाट केल्या. नवे पिळगेक हे कडेन आकर्शीत करचे खातीर किर्तना सारकें प्रशिक्षण शिबीर आयोजीत केल्ले खातीर अजीत पैंगीणकार हांणी आयोजकांचें कवतूक केलें.

सगळ्याच मळार आयज समस्या निर्माण जाल्ल्यो आसतनाच किर्तनाच्या माध्यमांतल्यान भारतीय संस्कृतीची नाळ परत जोडपाचो यत्न चल्ला, हे खातीर सुनील पैंगीणकार हांणी समाधान उक्तायलें.

किर्तन प्रशिक्षण शिबिरांत भोवसंख्य चलयांचो आस्पाव आशिल्ले खातीर सरपंच सविता तवडकार हांणी कवतूक केलें. बायलांनी देवाक पायां पडटना सावित्रीबाई फुडें हांचो सद्दां उगडास करपाक जाय, असोय तांणी  सल्लो दिलो.

विधायक उपक्रमा खातीर देवस्थानाचें सभाघर हे मुखार लेगीत उपलब्ध करून दितले, अशें ज्ञानानंद प्रभुगांवकार हांणी सांगलें.

ह्या शिबिरांत सत्संग, पाठ, नामस्मरण, प्रभातफेरी हांचो आस्पाव आसा. दुसऱ्या दिसा श्रीनृसिंह परशुराम ते श्री नवदुर्गा देवस्थाना मेरेन प्रभात फेरी काडली. तातूंत प्रशिक्षणार्थी वांगडा थळाव्या नागरिकांनी लेगीत व्हड प्रमाणांत वांटो घेतिल्लो.

श्री गोमंतक संत मंडळान खास बाबासाहेब आंबेडकार हांचे जिणेचेर किर्तन तयार केलां. ह्या विद्यालयांतले विद्यार्थी मराठी, हिंदी, इंग्लिशींतल्यान किर्तन सादर करतात, अशी म्हायती वझे हांणी दिली.

सुरवेक प्रशिक्षण शिबिरांत वांटो घेतिल्ल्या चलयांनी किर्तन नमन सादर केलें. सुत्रसंचालन दामोदर कामत हांणी केलें. अमिता पै खोत हांणी उपकार मानले. हे कार्यावळीक श्री परशसुराम देवस्थान समितीचे अध्यक्ष उदय प्रभुगांवकार, निवृत्त मुख्याध्यापक उल्हास पै भाटीकार, संदेश प्रभुदेसाय, प्रदीप पैंगीणकार, गोविंद लोलयेंकार, अ‍ॅड. साईश प्रभुगांवकार आनी हेर मानेस्त व्हड संख्येन हाजीर राविल्ले.