भांगरभूंय | प्रतिनिधी
सी टी रवीः देशाचे जडण घडणेंत वेपारी वर्गाचें व्हड योगदान
भांगरभूंय । प्रतिनिधी
दिवचलः देश प्रथम ही भाजपाची नीती. काँग्रेसीची नीती परिवार प्रथम. मोदींचो परिवार 140 कोटी आसा, जाल्यार काँग्रेसीचो परिवार गांधी- नेहरू आसा, अशें गोंय प्रभारी सी टी रवी हांणी सांगलें.
भाजपा वतीन सेवा सुशासन गरीब कल्याण येवजणे खाला दिवचले वेपारी संमेलन जालें. ह्या वेळार सी टी रवी हांणी वेपारी वर्गाक मोलादीक मार्गदर्शन केलें. ह्या वेळार माचयेर केंद्रीय मंत्री श्रीपाद नायक, मुख्यमंत्री डॉ. प्रमोद सावंत, प्रदेशाध्यक्ष सदानंद तानावडे, आमदार प्रेमेंद्र शेट, आमदार डॉ. चंद्रकांत शेटे, दयानंद सोपटे हाजीर आशिल्ले.
भाजपा कडेन जें लोकतंत्र आसा तें काँग्रेसी कडेन ना. देसाक आनी संवसाराक आयज नरेंद्र मोदी हांची गरज आसा. 2024 चे वेंचणुकेंत परतून एकदां मोदी ल्हास येतलें हें निश्चीत. सगळ्यांनी मोदी हांचें हात परतून एकदां घटमूट करचें, असो उलो रवी हांणी मारलो.
प्रधानमंत्री मोदी हांकां लागून देशाची क्रांती सुरू जाली. आयज देश सगळ्याच मळाचेर उदरगत करता आनी विश्वगुरू जावपाचे वाटेर आसा. वेपारी वर्गाच्या आदारान देश वयर पावला. भारता कडेन पळोवपाची संवसाराची नदर बदल्ल्या. आयज सगळो संवसार भारता कडेन मानान पळयता, अशें केंद्रीय मंत्री श्रीपाद नायक हांणी सांगलें.
सदानंद तानावडे हांणी सांगलें, विवीध मळा वयल्या मानेस्तां कडेन संवाद सादपा खातीर भाजपान विशेश कार्यावळ हातांत घेतली. लोकसंपर्क वाडोवचे खातीर डबल इंजीन सरकारान देश पांवड्याचेर चालू आशिल्ल्या उदरगतीच्या कामांक चालना दिली. भाजपा फुडाऱ्यांनी, लोकप्रतिनिधींनी संवेदनशील जावचें आनी आदार करचो, असो तांणी उलो मारलो.
डॉ. शेट्ये हांणी सांगलें, वेपारी हो अर्थवेवस्थेचो कणो. णव वर्सांत प्रधानमंत्री मोदी हांच्या धोरणांक लागून भारत संवसारीक म्हासत्ते वटेन वाटचाल करता. सर्वांगी उदरगतींत भारतान व्हड उड्डाण घेतलां.
सेवा, सुशासन, मोहीम आनी देशाची उदरगत करपांत प्रधानमंत्री मोदी हांच्या कुशळ फुडारपणाक लागून व्हड येस मेळ्ळां, अशें आमदार शेट हांणी सांगलें.
दयानंद सोपटे हांणी येवकार दिलो आनी णव वर्सांच्या कार्यकाळांतलो भाजपाच्या वावराचो नियाळ घेतलो. ह्या वेळार वेपारी वर्गान आपल्यो समस्या मांडल्यो तशेंच मोलादीक सुचोवण्यो केल्यो. मुख्यमंत्री सावंत हांणी सगळ्या समस्यांचेर जापो दिल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
