भांगरभूंय | प्रतिनिधी
मुख्यमंत्री : 27 त 27 उमेदवारांक जैतवंत करपाचो निश्चेव
भांगरभूंय । प्रतिनिधी
दिवचल : देश प्रथम ही भाजपाची निती. दरेका कार्याकर्त्यान पक्षाच्या ध्येय धोरणा प्रमाण आपलो गांव, राज्य आनी देश घटमूट करचे खातीर भाजपा फाटल्यान घट उबे रावचे. डबल इंजीन सरकार दरेकल्याच्या सुखदुख्खांत वांटो घेवन सगळ्यो येवजण्यो घराघरांनी पावोवन मानवी जिवीत समृद्ध करपाक बांदील आसा, अशें मुख्यमंत्री डॉ. प्रमोद सावंत हांणी सांगलें. भाजप दिवचल मतदारसंघ आयोजीत कार्यकर्तो मेळाव्यांत ते उलयताले.
मुख्यमंत्र्यां वांगडा ह्या वेळार प्रदेश अध्यक्ष दामू नायक, आमदार डॉ. चंद्रकांत शेटये, प्रदेश सचीव सिद्धार्थ कुंकळकार, दयानंद कारबोटकार, अध्यक्ष डॉ. कौस्तुभ पाटणेकार, नगराध्यक्ष विजयकुमार नाटेकार, वल्लभ साळकार, आदले सभापती राजेश पाटणेकार, प्रदीप रेवोडकार आनी विश्वास गांवकार हाजीर आशिल्ले.
येता ते 2027 चे विधानसभा वेंचणुकेंत 27 उमेदवार वेंचून हाडपाचो निश्चेव केला. दिवचल मतदारसंघांत लेगीत भाजपाचोच उमेदवाराक जिखून हाडपाचो निश्चेव सगळ्या कार्यकर्त्यांनी करचो. अपक्ष आमदार डॉ. चंद्रकांत शेट्ये हांचो भाजपाक पुराय तेंको आसा. दिवचले उदरगतीक व्हड प्रमाणार गती दिल्या. डॉ. शेट्ये हे उदरगतीचे बाबतींत फास्टट्रॅकाचेर आसा. तांकां आपणे मात्सो स्लो रावचें, अशें सांगलां. दिवचले खूबश्यो येवजण्यो चालीक लायल्यात. बेगिनूच 80 कोटी रुपया खर्च करून प्रशासकीय इमारती खातीर बुन्यादी फातर घालतले, अशें मुख्यमंत्री डॉ. सावंत हांणी सांगलें.
फाटले वेंचणुकेंत दिवचल मतदारसंघांत भाजप उमेदवार जिखूंक ना, हाची खंत आसाच. हे मुकार सामान्य कार्यकर्त्याचेर आडनदर जावची ना, हाची जतनाय घेवप गरजेचें आसा, अशेंय मुख्यमंत्र्यान स्पश्ट केलें.
प्रदेश अध्यक्षपदाचेर निवड जाल्ले खातीर दिवचल भाजप मंडळ समिती वतीन दामू नायक हांचो मुख्यमंत्री आनी हेर मानेस्तांचे हस्तुकीं सत्कार केलो.
कार्यकर्ते ही आमची शक्त. देश प्रथम ही भाजपची संकल्पना आसा. देशहिता खातीर सगळ्यांनी संघटीत रावपाची गरज आसा. डॉ. सावंत हांच्या मार्गदर्शना खाला 27 त 27 उमेदवार जैतवंत करपाचो आमचो निश्चेव पुराय करचो, अशें दामू नायक हांणी सांगलें.
पयल्या दिसा सावन आपणे भाजपाक तेंको दिला. तीन वर्सांत सर्वांगी उदरगत केल्या. दिवचले व्हड शासकीय संकूल, कला भवन हाचे खातीर 80 कोटी रुपया मंजूर जाल्यात. बेगिनूच ताचे खातीर बुन्यादी फातर बरयतले. तशेंच खेळां संकूल आनी हेर येवजण्यो चालीक लायतले, अशें डॉ. शेट्ये हांणी सांगले.
डॉ. कौस्तूभ पाटणेकार हांणी येवकार दिलो, संजय म्हापसेकार हांणी सुत्रसंचालन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
