भांगरभूंय | प्रतिनिधी
कोलकातांतल्या आर जी कर वैजकी म्हाविद्यालयांत तरणाटे दोतोराचेर जाल्लो बलात्कार आनी खून प्रकरणान पुराय देश तिडकला. अजूनय देशाच्या खाची- कोनशांनी निदर्शनां जायत आसात. सर्वोच्च न्यायालयान दोतोरांक सुरक्षा मेळची म्हूण नेमकें कितें करचें, हे सुचोवपाक णव वांगड्यांच्या कृती दळाची स्थापना करपाचो आदेश दिला. चलयेचो पोस्टमार्टेम अहवाल आयलो तरी गुन्यांव नोंद करपाक उशीर जाल्लो. ते खातीर सर्वोच्च न्यायालयान अस्तंत बंगाल सरकाराचेर तिडक उक्तायल्या. फाल्यां 22 मेरेन सद्यस्थिती अहवाल सादर करपाचे निर्देश दिल्यात. कोलकातांत जो प्रकार जालो, तें म्हाविद्यालय, हाॅस्पिटल व्हडलें. शेंकड्यांनी विद्यार्थी थंय शिकतात. राज्यांतल्या ह्या आघाडेच्या हाॅस्पिटलांत सारकी सुरक्षा वेवस्था नासप ही लजेची गजाल.
9 आॅगस्टाक ही घडणूक घडली. पूण हाॅस्पिटलान कागाळ करपाक, पुलिसांनी ती नोंद करून घेवपाक कित्याक उशीर केलो, तें कळना. ते 31 वर्सां पिरायेचे दोतोर चलयेचे पालक थंय आयले तेन्ना तांकां ते चलयेन आत्महत्या केली, अशें सांगलें. मात जीव दिवपी चलयेच्या आंगार उणें कपडे कशे आसतले, तिच्या दोळ्यांतल्यान रगत कशें येतलें, गुप्त भागांचेर घावो कसो आसतलो, वीर्य कशें मेळटलें, हाचो विचार तिणें आत्महत्या केली, अशें सांगप्यान करपाक जाय आशिल्लो. पालकांक भितर वचून तिका सारकी पळोवपाकूय दिवंक ना. ह्या प्रकरणांत संजय राॅय हाका अटक जाल्या. ह्या प्रकरणांत तो एकलोच आसा, काय आनिकूय कोण घुस्पल्यात, हाचो सोद घेवप गरजेचें. संजयाचो इतिहास वादग्रस्त आसा. खुद्द ह्या हाॅस्पिटला विशींय कांय राष्ट्रीय वॅबसायटींचेर छापून आयलां. थंय फाटल्या 23 वर्सांच्या काळांत जायत्यो घडणुको घडल्यात खंय. थोड्यांचो तपासूय जावंक ना. 2001 त सौमित्र बिस्वास ह्या दोतोरकी शिकपी विद्यार्थ्याची गोळाक लायिल्ली कूड मेळिल्ली. ही आत्महत्या न्हय, तर हत्या असो दुबाव ताचे आवयन उक्तायिल्लो. पोर्नोग्राफी कडेन संबंदीत रॅकेट हांगा चलता, हें पुताक कळिल्ल्यान ताका मारलो, असो गंभीर आरोपूय तिणें केल्लो. त्याच वर्सा एका इंटर्न दोतोराची कूड मेळिल्ली, 2003 त एका कामगारान उडी मारून आत्महत्या केल्ली, 2016 त गौतम पाल ह्या प्राध्यापकाची कूड मेळिल्ली. ताका आताक आयलो अशी नोंद आसा. पूण ताच्या मुखामळाचेर घावे आशिल्ले खंय. 2020 त पुलोमी सहा ह्या ट्रेनी दोतोरान वयल्यान उडी मारून जीव दिल्लो. चडश्या प्रकरणांचो तपास मुखार आडकून उरलो, अशें कळटा. म्हणल्यार हांगां कितें तरी गौड’बंगाल’ आसा, अशें म्हणपाक वाव आसा. सीबीआयन हाचो खोलायेन तपास करपाक जाय. हांगा काम करपी आदले, आतांचे दोतोर खूब कितें सांगपाक शकतले.
व्हडल्या हाॅस्पिटलांनी दुयेंती आनी तांच्या लागींच्यांची गर्दी आसता. थंय स्टाफूय चड आसता. म्हणटकच कोण येता, कोण वता ताचेर नदर दवरप जायना. ताका लागून सीसीटीव्ही कॅमेरे, सुरक्षा रक्षकांचो आंकडो वाडपाक जाय. कांय खाजगी हाॅस्पिटलांनी सुरक्षा रक्षक पसून नात, अशें दिसून आयलां. बायल दोतोरांच्यो खूब समस्या आसात. त्यो सोडोवपाक जीएमसींत आनी हेर हाॅस्पिटलांनी स्वतंत्र बायल दोतोराची नेमणूक करपाची घोशणा सरकारान केल्या. निवासी दोतोरांच्यो समस्या जाणून घेवपाकूय एक दोतोर नेमतले. गोंय असोसिएशन आॅफ रेसिडेंट डाॅक्टर (गार्ड) हे संघटणेन केल्ल्यो सगल्यो मागण्यो पूर्ण करतले अशेंय जाहीर केलां. गार्डान आपलो संप काल सांजवेळा फाटीं घेतलो. व्हडल्या हाॅस्पिटलांनी बायल दोतोर, नर्स एका माळ्या वेल्यान दुसऱ्या माळ्याचेर वता, तेन्ना तांकां सुरक्षा रक्षक दिवप गरजेचें. तशी मागणी गार्डान केल्या. काळखी वाठारांत दिवे लावप, दुयेंतींक मेळपाक येतात, तांकां वेगळो पास दिवप… अश्यो मागण्योय तांणी केल्यात. प्रशासना वांगडाच दुयेंतींचे सोयरे, घरचीं येतात, तांणीय सादूर रावन कोणाचो दुबाव आयल्यार रोखडेंच हाॅस्पिटलाच्या जापसालदार व्यक्तीक सादूर करपाक जाय. कारण,
कोलकाता जें जालें, तें देशांत खंयूय घडपाक शकता.
गोंयांत प्रॅक्टीस करपी वा हाॅस्पिटलांनी काम करपी दोतोरां
मदीं साठ टक्के बायलो आसात. 90 टक्के बायल नर्सी
आसात. तांची सुरक्षा म्हत्वाची. कारण भलायकी मळार रातपाळी करचीच पडटा. तांकां विसव घेवपाक सुरक्षीत कुडी आसूंक जाय. हाॅस्पिटल वाठारांत सुरक्षा रक्षक जाय. पुलिसांचीय गस्त वाडपाक जाय.
समाजाची भलायकी इबाडल्या. ती जाग्यार हाडपाचें काम दोतोर करतात. पूण, तेच जर सुरक्षीत नात, जाल्यार लोकांचे भलायकेचे प्रस्न जाग्यार तरी कशे पडटले?
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
