भांगरभूंय | प्रतिनिधी
पणजी : देश पावंड्या वेल्या ‘देश का प्रकृती परिक्षण’ अभियानाचो गोंयांत मंगळारा शुभारंभ जालो. गोंयांत एका म्हयन्याच्या काळांत भलायकी केंद्रांनी 1 लाख लोकांच्या भलायकेची चिकित्सा जातली, अशी म्हायती भलायकी खात्याचे सचीव अरुणकुमार मिश्रा हांणी दिली.
गोंयांत अभियानाचो शुभारंभ जालो. ‘देश का प्रकृती परिक्षण’ अभियान देश पांवड्यार सुरू आसा. पयलो पावंडो 26 नोव्हेंबर ते 25 डिसेंबर मेरेन चलतलो. गोंयांतल्या भलायकी केंद्रांनी म्हयन्याक 1 लाख दुयेंती उपचारा खातीर भेट दितात. भलायकी केंद्रातले आयुष दोतोर आयुर्वेदाच्या आदारान तांचे भलायकीचें परिक्षण करतले. दुयेंसा जावपाचो धोको आनी कशे तरेन जतनाय घेवपाक जाय, हाचो सल्लो ते ह्या वेळार दितले. गोंयांत 978 दोतोर आयुर्वेदाची प्रॅक्टीस करतात. भलायकी केंद्रांनी 200 आयुष दोतोर आसा. मन थीर दवरपा सयत शरीर निरोगी रावपा खातीर कशे तरेचो आहार घेवचो, जिणेची पद्दत, व्यायाम हाची म्हायती दुयेंतींक दितले.
ह्या मोहिमेच्यो गोंयच्यो संघटक डॉ. स्नेहा भागवत, डॉ. मीनल जोशी आनी हेर दोतोर हाजीर आशिल्ले. मनशाचे मन थीर दवरपा सयत आरामदायी जीण जगपा खातीर आयुर्वेद चिकित्सा पद्दत पुरक थारता. हाका लागून प्रधानमंत्री नरेंद्र मोदी हांच्या फुडाकारान ‘देश का प्रकृती परिक्षण’ अभियान सुरू जालां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
