भांगरभूंय | प्रतिनिधी
तरणाट्या भुरग्यां बराबर अश्लील चॅटिंग करून तांकां जाळांत ओडप आनी उपरांत तांचे कडल्यान अश्लील कृत्यां करून घेवप आनी ते करतना तांचे व्हिडियो रेकॉर्डिंग करप. ते व्हिडियो रेकॉर्डिंग व्हायरल करपाची धमकी दिवन तांचे कडल्यान लाखांनी रुपयांची खंडणी वसूल करप अशें तंत्र सायबर माफियांनी कांय दिसां सावन आपणायलां. हेंच तंत्र आतां पाकिस्तानानूय आपणायलां आनी भारतांतल्या संरक्षक विशया वेल्या म्हत्वाच्या पदार आशिल्ल्या मनशांक हांयस दाखोवन आनी तांकां जाळांत ओडून तांचे वतीन भारतांतल्या संरक्षण विशयाची म्हत्वाची म्हायती एकठांय करतात. अशीच संरक्षक विशयाची म्हत्वाची म्हायती पाकिस्तानाक दिल्ले खातीर रवीकुमार वर्मा ह्या तरणाट्याक पुलिसांनी हालींच अटक केली.
रवीकुमार वर्मा हो एक न्हय जाल्यार दोन पाकिस्तानी बायलांच्या संपर्कांत आशिल्लो. ताणें ह्या दोनूय बायलांक सोशल मिडियाच्या माध्यमांतल्यान वेळावेळार भारतीय नौदळ आनी डॉकयार्डातल्यो पाणबुड्यो आनी बोटींची संवेदनशील म्हायती पाकिस्तानाक धाडिल्ली अशें एटीएसाचे चवकशेंतल्यान मुखार आयलें. रवीकुमार वर्मा हो नेव्हल डॉकांत ज्युनियर मेकॅनिकल फिटर इंजिनियर आशिल्लो. पाकिस्तानी बायलांची रवीकुमार वर्मा कडेन सोशल मिडियाचेर वळख जाले उपरांत ह्या बायलांनी ताचे कडेन अश्लील चॅटिंग करून आमी तुमकां प्रत्यक्ष मेळटलीं अशी भूल घालून ताका ह्या बायलांनी सेगीत गुंतोवन दवरिल्लें. ताची अर्थीक परिस्थिती बिकट आशिल्ल्यान ह्या बायलांनी ताका अर्थीक मजतूय केली. पाकिस्तानांतल्यान ताच्या बँक खात्यांत पयशे जमा जाल्ल्याचेंय स्पश्ट जालां. रवीकुमार वर्माच्या ह्या कारनाम्यान देशभर खवदळ पडलो. अर्थांत हनी ट्रॅपांत आडकून देशा कडेन गद्दारी करपी रवीकुमार वर्मा हो पयलोच मनीस न्हय. फाटल्या वर्साच डीआरडीओ ह्या देशाचें संरक्षण साहित्य तयार करपी संस्थेंत शास्त्रज्ञ आशिल्ल्या डॉ. प्रदीप कुरुलकर ह्या मनशाक पुलिसांनी पाकिस्तानाक देशाच्या संरक्षणा विशीं गुप्त म्हायती दिल्ल्याच्या आरोपा खाला अटक केल्ली. विशेश म्हणल्यार डॉ. करुलकर हो डीआरडीओ संस्थेंत फाटल्या 38 वर्सां सावन काम करता. ताणें डीआरडीओच्या मुखेल क्षेपणास्त्रांच्या प्रक्षेपक आनी ग्रावंड सिस्टीमचे निर्मितींत म्हत्वाची भुमिका वठयल्या. मिशनशक्ती ह्या उपग्रहभेदी क्षेपणास्त्राच्या प्रक्षेपकाची निर्मिती ताच्याच फुडारपणा जाली. डॉ. एपीजे अब्दुल कलाम हांचे बरोबर ताणें खूबशीं वर्सां काम केलां. ताची निवृत्ती फक्त स म्हयन्याचेर आसतना हें प्रकरण उक्तडार आयलें.
फाटल्या कांय वर्सां सावन तो पाकिस्तानाच्या गुप्तचर विभागांतल्या एका बायलेच्या संपर्कांत आशिल्लो. हे बायलेन नांवांत बदल करून ताचे कडेन संपर्क सादलो. इश्टागतीचें (काय मोगाचें) नाटक करून ताचे कडेन संपर्क वाडयलो आनी ताचे कडल्यान देशाच्या संरक्षणा विशींची म्हत्वाची म्हायती हस्तगत केली. डॉ. करुलकर हो पाकिस्तानाच्या हनी ट्रॅपांत आडकल्ल्यान देशाच्या संरक्षणा विशींची खूबशी म्हत्वाची आनी गुपीत म्हायती पाकिस्ताना मेरेन पावली. केंद्र सरकारान हाची गंभीरतायेन दखल घेवन ताका रोखडीच अटक केली.
हनी ट्रॅपांत आडकून देशा कडेन गद्दारी करपी हे दोगूच न्हय हाचे पयलींय बीएसएफचो एक जवान, अरूण मारवाह नांवाचो वायुदळांतलो एक अधिकारी हनी ट्रॅपांत आडकल्लो. दुस्मान राष्ट्राच्या पंगडांत भितर सरून तांचे कडल्यान गुपीत म्हायती काडून घेवप हे खातीर हांयसाचो वापर करप हें पयलीं सावन चलत आयलां. सगलेच देश अशे करतात. पूण आतां म्हायती तंत्रज्ञान युगांत हें करप सामकें सोंपें जालां. कारण सोशल मिडियाच्या माध्यमांतल्यान अशा म्हत्वाच्या पदा वेल्या मनशां कडेन संपर्क सादप आतां सहज शक्य जालां. पाकिस्तानांतल्या गुप्तहेर बायलांनीय हेंच केलें, आनी रवीकुमार वर्मा, डॉ. कुरुलकर हांकां ह्या बायलांनी आपल्या जाळांत ओडली. आतां रवीकुमार वर्मा हाची खोलायेन चवकशी जातली आनी तातूंतल्यान खूबशी धक्को दिवपी म्हायती मुखार येतली. पूण देशाची संरक्षणा विशींची गुपीत म्हायती पाकिस्तानाक मेळ्ळी. ते खातीर देशाच्या संरक्षणा कडेन मोटो घात निर्माण जाला. ताका लागूनच हनी ट्रॅपांत आडून देशा कडेन गद्दारी करपी रवीकुमार वर्मा सारक्या गद्दारांक खर ख्यास्त दिवंक जाय.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
