भांगरभूंय | प्रतिनिधी
भारताची राजधानी दिल्लींतल्या लाल किल्ल्या लागसार सोमारा एक भिरांकूळ आत्मघाती हल्लो जालो. गाडयेंत जाल्ल्या ह्या स्फोटाक लागून राजधानीच न्हय तर पुराय देश हालोवन उडयलो. ह्या स्फोटांत 13 नागरिकांचो जीव गेलो आनी 25 परस चड नागरिक गंभीर जखमी जाले. ह्या हल्ल्या उपरांत पुराय देशांत हाय अलर्ट जाहीर केला. ह्या हल्ल्याची चवकशी केंद्र सरकारान एनआयए कडेन दिल्या.
एनआयए ह्या हल्ल्याची योग्य चवकशी करतली आनी ताचे फाटल्यान कोण आसा तें सोदून काडटली, पूण शाळेंतल्या भुरग्यांक लेगीत हो हल्लो पाकिस्तानाच्या आदारान आतंकवाद्यांनी केला हें सांगतलीं. फाटलीं कांय वर्सां शांत आशिल्ले आतंकवादी परतून सक्रीय जाल्यात हें ह्या हल्ल्यांतल्यान स्पश्टपणान दिसून येता. ते आतंकवादी कारवाय करून, देशांत अशांतताय निर्माण करून भारतांतल्या निरपराधी नागरिकांक लक्ष्य करपाचो हेतू आसा, हाका लागून देशांत धर्मीक दंगली जावन अराजकता निर्माण करपाची तांची येवजण आसा.
भारता कडेन मुखार रावन झुजून आपूण जिखूंक शकना हें पाकिस्तानाक ऑपरेशन सिंदूरा उपरांत कळ्ळें आसतलें, देखून ताणें आपली पोरणी पद्दत परतून वापरपाक सुरवात केली. ते खातीर ताणें आतंकवाद्यांक परतून सक्रिय केले. ह्या हल्ल्याच्या आदल्या दिसा तीन शारांनी रसायनीक हल्ले करपी आतंकवाद्यांचे भिरांकूळ कट पुलिसांनी उक्ते केल्ले. गुजरात पुलिसांच्या कारवाये उपरांत जम्मू-काश्मीर पुलिसांनी आतंकवादी जाळें मोडून सात जाणांक अटक केल्ली. तांणी हरियाणाच्या फरीदाबादांतल्यान तीन हजार किलां वयर आरडीएक्स जप्त केला. हाका लागून एक व्हडली आपत्ती टळ्ळी. हे खातीर सुरक्षा दळांची तोखणाय करपाक जाय. हे स्फोटक पदार्थ मेळूंक नाशिल्ले आनी आतंकवाद्यांची येवजण येसस्वी जाल्ली जाल्यार देशांत गोंदळ जावपाचो. पूण हरियाणा आनी जम्मू- काश्मीरा प्रमाण दिल्लींतल्या स्फोटाक सुरक्षा दळाक आडावंक मेळूंक नाशिल्ल्यान निरपराधी लोकांचो जीव गेलो.
2011 उपरांत दिल्लींत असो भिरांकूळ हल्लो जावपाची ही पयलीच खेप. हो भारतीय सार्वभौमत्वाचेर हल्लो, देखून ताचो सूड घेवचो पडटलो. भारतान ह्या हल्ल्याचो सूड घेवचो आनी आतंकवाद्यांक फावो ती जाप दिवची. कांय म्हयन्यां आदीं आतंकवाद्यांनी पहलगामांत अशेच तरेन निरपराधी नागरिकांक लक्ष्य करून तांकां मारले. ते उपरांत भारतान पाकिस्तानांत भितर सरून आतंकवादी शिबिरां नश्ट करून शंबरां परस चड आतंकवाद्यांक मारिल्ले. घडये ताकाच लागून तिडकल्ल्या आतंकवाद्यांनी देशांत आतंकवादी वावर सुरू केला. अर्थांत, हाचे खातीरय आतंकवाद्यांक ख्यास्त मेळटली, हातूंत दुबाव ना. पहलगाम हल्ल्याचो सूड भारतीय सैन्यान ऑपरेशन सिंदूर चालीक लावन घेतलो. फुडाराक दिल्ली हल्ल्याचोय सूड ऑपरेशन सिंदूर भाग 2 चालीक लावन सरकार घेतलें.
सरकार आपलें काम करतलें, पूण आतां नागरिकांचीय जापसालदारकी वाडल्या. आपल्या शारांत वा वाठारांत कांय दुबावीत गजाली घडटात असो दुबाव आयल्यार पुलिसांक कळोवचें. शारांनी आनी शारांनी आतंकवाद्यांचे स्लीपर सेल अस्तित्वांत आसपाची शक्यताय आसा. अशी दुबावीत कृती करपी खंयचीय व्यक्ती वा संघटणा मेळ्ळी जाल्यार पुलिसांक कळोवचें. सोडून दिल्ल्या खंयच्याय वस्तूक हात लावचो न्हय. तसली वस्तू मेळ्ळी जाल्यार पुलिसांक कळोवचें. नागरिकांनी सादूर रावल्यार आतंकवाद्यांच्यो येवजण्यो येसस्वी जावच्यो नात. आतंकवादी मनीसपणाचे दुस्मान. मनीसपणाचे दुस्मान ना करपाची जापसालदारकी जितली सरकाराचेर आसा तितलीच नागरिकांचेरय आसा.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
