भांगरभूंय | प्रतिनिधी
नवी दिल्ली, खबरां संस्था ः देशांतल्या गिरेस्त लोकां मदीं लेगीत जातीय असमानताय दिसून येता. गिरेस्त लोकां मदीं 89% जनरल, 8% ओबीसी आनी 3% एससी- एसटी वर्गांतले आसात. ‘बिझनेस स्टँडर्डा’न तीन संशोधनाच्या आदाराचेर ही आंकडेवारी दिल्या. एनएसएसओच्या ताज्या सर्वेक्षण प्रमाण, देशांतली 41% लोकसंख्या ओबीसी, 20% एसी, 9% एसटी आनी 30% जनरल वर्गांतली आसा. म्हळ्यार लोकसंख्येचे तुळेंत गिरेस्तकायेतली असमानताय स्पश्टपणान दिसता.
2022 मेरेन देशांतली 88.4% संपत्ती जनरल जातींची आशिल्ली, जाल्यार अनुसुचीत जातींचो वाटो फकत 2.6% उरिल्लो. हें संशोधन मे 2024 वर्सा ‘वर्ल्ड इनइक्वॅलिटी लॅबान’ जाहीर केल्ल्या ‘टूवर्ड टॅक्स जस्टिस अँड वेल्थ रिडिस्ट्रिब्युशन’ अहवालाच्या आंकड्यांच्या आदाराचेर केलां. ते प्रमाण 8% ओबीसी अब्जाधीश आसात. एसटी वर्गांतलो एकलोय कोट्यधीश ना. फाटल्या 14 वर्सांत देशांतल्या संपत्तींत ओबीसींचो वाटो 2 टक्क्यांनी उणो जाला, जाल्यार एससी- एसटींचो वाटो 2 टक्क्यांनी वाडला अशें अहवालांत म्हणलां. 2008 वर्सा ओबीसींचो वाटो 10% आशिल्लो, जो 2022 वर्सा 8% जालो.
देशांतल्या गिरेस्त वर्गांत वट्ट 31% एससी- एसटी आनी ओबीसी हांचो आस्पाव जाता. हांतूत ओबीसींचो सगळ्यांत चड वांटो 15.6% आसा. पूण 14 वर्सांत सुमार 5% उणो जाला.
2020 ते 2022 ह्या काळांत फकत दोन वर्सांत देशाच्या गिरेस्तकायेंत जनरल वर्गाचो वाटो 4% आनी एससी-एसटीचो वाटो 1% वाडला. जाल्यार ओबीसींचो 4 टक्क्यांनी देंवला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
