देशाचे तुळेंत गोंयांतलो किरकोळ म्हारगाय दर उणो

भांगरभूंय | प्रतिनिधी

पणजीः फाटल्या कांय म्हयन्यांत गिरायक दर निर्देशांकाचेर आदारीत गोंयचो किरकोळ म्हारगाय दर हेर राज्यां परस चड आशिल्लो. पूण फेब्रुवारींत म्हारगाय दर परतून उणो जावन 2.18 टक्के जालो. देशांत किरकोळ म्हारगाय दर उणो आसपाचे क्रमवारींत गोंय पांचवे सुवातेर आसा. फेब्रुवारींत देशाचो म्हारगाय दर 3.21 टक्के उरलो. अन्नधान्य आनी तंबाखूच्या उत्पादनांचे दर वाडिल्ल्यान जानेवारीच्या तुळेंत फेब्रुवारींत राष्ट्रीय म्हारगाय दरांत किरकोळ वाड जाल्या.
केंद्रीय सांख्यिकी आनी अंमलबजावणी खात्यान म्हारगाय दर थारावपा खातीर 2024 हें मूलभूत वर्स आसतलें अशें थारायलां. तशेंच म्हारगायेंत अन्नधान्याक चड म्हत्व दिलां. ह्या बदला प्रमाण जानेवारी म्हयन्याचो म्हारगाय दर काडलो. फुडाराकूय हेच पद्दतीन काडटले अशें खात्यान स्पश्ट केलां.
खात्याच्या अहवाला प्रमाण गोंयांत जानेवारींत म्हारगाय दर 1.92 टक्के आशिल्लो. डिसेंबरांत 3.18 टक्के, नोव्हेंबरांत 3.14 टक्के, ऑक्टोबरांत 3.41 टक्के, सप्टेंबरांत 3.87 टक्के आनी ऑगस्टांत 3.89 टक्के आशिल्लो.
फेब्रुवारी म्हयन्यांतलो म्हारगाय दर फाटल्या धा म्हयन्यांतलो सगळ्यांत चड आसा. फेब्रुवारींत मिझोरमांत सगळ्यांत उणो म्हळ्यार 0.1 टक्के म्हारगाय दर आशिल्लो. ताचे उपरांत मणिपूर (1.01 टक्के), जम्मू-काश्मीर (1.86 टक्के), अरुणाचल प्रदेश (1.89 टक्के) हांचो क्रमांक लागता. जाल्यार तेलंगणांत सगळ्यांत चड 5.02 टक्के म्हारगाय दर आशिल्लो. हाचे भायर केरळ (3.5 टक्के), आंध्र प्रदेश (3.45 टक्के), तमिळनाडू (3.43 टक्के), मध्य प्रदेश (3.43 टक्के) ह्या राज्यांनी म्हारगाय दर तुळेन चड आशिल्लो.