भांगरभूंय | प्रतिनिधी
पणजीः राज्यांतल्या गांवगिर्या वाठारांनी ५जी इंटरनॅट सुविधेचें प्रमाण राष्ट्रीय सरासरी परस चड आसा. केंद्रीय रेल्वे खात्यान दिल्ले म्हायती प्रमाण राज्यांतल्या ३९२ गांवां मदल्या ३०९ (७८.२२ टक्के) गांवांनी ५जी इंटरनॅट सेवा उपलब्ध आसा. हाची राष्ट्रीय सरासरी ५७ टक्के इतली उणी आसा. गांवगिर्या वाठारांनी ५जी सुविधा उपलब्ध जावपाचे नदरेन देशांत हरियाणा मुखार आसा. ही सुविधा ताच्या ९७ टक्के वाठारांनी उपलब्ध आसा. जाल्यार केरळांतल्या ९५ गांवांनी अशी सुविधा आसा.
खात्याच्या अहवाला प्रमाण, राज्यांतल्या वट्ट ३९२ गांवांचो ह्या गांवगिर्या वर्गांत आस्पाव केला. हातुंतल्या ३५५ (९० टक्के) गांवांनी मोबायल कव्हरेज आसा. जाल्यार ३७ (१० टक्के) गांवांनी अजून मोबायल कव्हरेज ना. वट्ट गांवांतल्यान ३२७ (८३ टक्के) गांवांनी २जी इंटरनॅट सुविधा आसा.१३२ गांवांनी (३४ टक्के) ३जी सुविधा उपलब्ध आसा आनी ३४५ गांवांनी (८८ टक्के) ४जी इंटरनॅट सुविधा उपलब्ध आसा. देशांतल्या सगल्या ग्रामपंचायतींक टप्प्याटप्प्यान ब्रॉडबँड जोडणी दिवपा खातीर भारतनेट प्रकल्प सुरू केला. भारतनेट प्रकल्प गोंयांत राबयनात.
ह्या प्रकल्पा खाला फेब्रुवारी २०२६ मेरेन देशभरांतल्या २ लाख १७ हजार ८०५ ग्राम पंचायतींक इंटरनॅट सुविधा दिल्या. तशेंच हेर गांवांक तांच्या मागणे प्रमाण इंटरनॅट जोडणी दिवपाची वेवस्था सुरू आसा. तशेंच केंद्राच्या एबीपी प्रकल्पा खाला फायबर इंटरनॅट जोडणी दिवपाची तजवीज केल्या. ४जी सॅचुरेशन प्रकल्प आनी हेर मोबायल कनॅक्टीव्हीटी प्रकल्पां खाला फेब्रुवारी २०२६ मेरेन देशांत २४ हजार २६३ मोबायल टॉवर सुरू जाल्यात अशें अहवालांत म्हणलां.
राज्यांत २ हजारां परस चड ५जी बीटीएस
केंद्र सरकारान १ एप्रिल २०२२ ते ३१ ऑक्टोबर २०२५ ह्या काळांत गोंयांत वट्ट २,३१९ ५जी बीटीएस स्टेशनां स्थापन केल्यांत. ह्या काळांत देशभरांत २ लाखां परस चड ५जी बीटीएस स्थापन केल्यांत.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
