भांगरभूंय | प्रतिनिधी
नवी दिल्ली: सरकार आपलें ’अर्थीक रिपोर्ट कार्ड’ म्हळ्यार इकॉनॉमीक सर्व्हे आयज २९ जानेवारीक सादर करतलो. हो सर्व्हे सांगतलो, फाटल्या एका वर्सांत म्हारगायेन तुमच्या ताटाचेर कितलो परिणाम केला, शेताची कितें स्थिती आसा आनी येवपी काळांत तुमचे खातीर नवीन नोकर्यो वाडटल्यो काय ना.
ह्या ६ व्हड गजालींचेर लक्ष आसतलें
१. म्हारगाय: सर्व्हेत सांगतले, दाळ, तेल आनी भाजयांच्यो किमती वाडपा फाटलें खरें कारण कितें आशिल्लें. येवपी काळांत तुमकां वाडपी किमती पसून थाकाय मेळटली काय?
२. GDP: भारत संवसारांतली सगल्यांत वेगान वाडप अर्थव्यवस्था उरतली काय? जर GDP वाडलो, जाल्यार हाचो सरळ अर्थ असो आसा, देशांत नवीन गुंतवणूक येतली आनी वेपार वाडटलो.
३. नोकरी: आयटी, मॅन्युफॅक्चरिंग वा सेवा क्षेत्र. खंयच्या क्षेत्रान सगल्यांत चड नोकर्यो दिल्यो आनी खंय कर्मचारी कपातीचो धोको आसा? तरणाटीं हो सगल्यांत म्हतवाचो विभाग आसतलो.
४. शेती-शेतकरी: देशांतली अर्दी लोकसंख्या शेतीचेर निंबून आसा. अंदूं शेताचे उदरगतीचें दर कितें आशिल्लें, शेतकारांचें उत्पनन वाडोवपा खातीर सरकारा कडेन खंयची नवी येवजण आसा, हें सर्वेक्षण सांगतलें.
५. सरकारी रीण: सरकार आपल्या जोडी परस चड खर्च करता ताका ’राजकोषीय तूट’ म्हणटात. तूट उणी जावपी म्हळ्यार घटमूट अर्थवेवस्था आनी उणी म्हारगाय.
६. परकीय चलन सांठो: संवसारभरांत मंदीचें वारें लागिल्लें आसतना भारताचो परकीय चलन सांठो कितलो आसा? हो सांठो जितलो भरिल्लो आसतलो, तितलो रुपया डॉलराचे तुळेंत घटमूट उरतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
