भांगरभूंय | प्रतिनिधी
नवी दिल्ली, खबरां संस्था: नवी दिल्लींत चालू आशिल्ल्या २१व्या ईव्ही एक्स्पोंत दवरिल्ल्या ईव्ही वाहनांच्या मॉडेलांचेर नदर मारल्यार देशांतल्या येरादारी वेवस्थेंत व्हड बदल जावपाक लागला अशें दिसता. संवसारीक सरासरीच्या तुळेंत परंपरीक गाडयो आनी एसयूव्ही हांचो ईव्ही वापर मात्सो मंद आसलो तरी ई-रिक्शा आनी दुचाकी वाहनांची विक्री नेटान वाडत आसा.
अंदूं पयलेच फावट देशांत ई-थ्री व्हीलरची विक्री ६ लाख आनी ई-टू व्हीलरची विक्री १० लाखांच्या फुडें गेल्या. ईव्ही विक्रेंतलो तांचो वाटो ८% चेर पावला. रेटिंग एजन्सी अरायसीआरएच्या मतान, २०२५त ताचो हिस्सो दुप्पेटीन जावन १६% जातलो. इलेक्ट्रिक व्हेयीकल फेडरेशनाचे अध्यक्ष अनुज शर्मा म्हणटात, कांय वर्सांनी देशांतल्या रस्त्यांचेर एक कोटीं परस चड ई-वाहनां आसतलीं. आतां ई-बसी वरवीं व्हडलीं शारां ल्हान शारां कडेन जोडटात. ल्हान शारां ग्रामपंचायतीं कडेन जोडपाची तयारी सुरू आसा. येवपी तीन ते पांच वर्सांनी ई-थ्री व्हीलर ५० टन तांकीच्या पिकअप्स पेट्रोल आनी डिझेल वाहनांचे विक्रेक फाटीं उडयतले.
ईव्ही एक्स्पो २०२४ चे अध्यक्ष राजीव अरोरा म्हणटात, सरकारान ह्या चिनी मॉडेलांचो अभ्यास केला. तांकां ह्यान मुखार वचपाचें आसा. मात इतल्या व्हड प्रमाणाचेर भूसंपादन हें व्हड आव्हान आसा. चीनान डझनभर गांव ताब्यांत घेवन आयटी पार्क तयार केल्ल्याचें तांचें म्हणणें आसा. दरेका आयटी पार्कान २०-२५ लाख लोकांक रोजगार दिला. हाका लागून चीन मदर ऑफ ईव्ही जाला.
ह्यान पयलीं देशांतल्या फकत ८ राज्यांनी ई-रिक्षाक परवानगी आशिल्ली. आतां पुराय देशांत एल ५ ऑटो वरवीं प्रवेश करपाक मेळटलो. हातुंतल्यान व्हड बदल जावपाचो आसा, अशेंय तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
