देशांत 4 नवीन कामगार संहिता लागू

भांगरभूंय | प्रतिनिधी

नवी दिल्ली, खबरां संस्था ः सरकारान चार नवीन कामगार संहिता (labor codes) चालीक लायल्यात. देशभरांतल्या सगळ्या कामगार आनी कर्मचाऱ्यां खातीर हो म्हत्वाचो निर्णय. पयलीं अस्तित्वांत आशिल्ल्या 29 वेगवेगळ्या कामगार कायद्यांतले गरजेचें घटक चार सोंपें आनी स्पश्ट नेमांत विभागल्यात.
दरेका कामगाराक वेळार आनी ओव्हरटायम पगार, उण्यांत उणो पगार, बायलां खातीर समान संद आनी पगार, समाजीक सुरक्षा आनी मोफत भलायकी तपासणी मेळची असो ह्या नव्या नेमांचो हेत आसा. नव्या कायद्या प्रमाण कर्मचाऱ्यांक पांच वर्सां बदला फकत एका वर्सांत ग्रेच्युटी लाव मेळूं येतात.
पोरणे कामगार कायदे 1930 ते 1950 ह्या काळांत चालीक लायिल्ले. जेन्ना काम, उद्देग आनी तंत्रगिन्यान आयच्या काळापरस सामकें वेगळे आशिल्ले. आधुनीक गरजो आनी आंतरराश्ट्रीय मानक मतींत घेवन नवीन संहिता तयार केल्यात. देखून 29 पोरणे कामगार कायदे सोंपे करून चार कामगार संहितेंत एकठांय केल्यात.

चार नवीन संहिता

1. पगार संहिता, (Wage Code) 2019: पगार संबंदीत नेम आनी उण्यांत उण्या पगाराची हमी.
2. उद्देगीक संबंद संहिता, (Industrial Relations Code) 2020: कामगार आनी वेवस्थापन हांचे मदले संबंद.
3. समाजीक सुरक्षा संहिता, (Social Security Code) 2020: कामगारांक समाजीक सुरक्षा येवजण्यो आनी तांचे फायदे.
4. वेवसायीक सुरक्षीतताय, भलायकी आनी कामाची परिस्थिती संहिता (OSHWC), 2020: कामाची सुरक्षीतताय आनी भलायकी परिस्थिती.

कामगारांक फायदो…
० सगळ्या कामगारांक वेळार उण्यांत उणो पगार.
० सगळ्या तरणाट्यां कामगारांक नेमणूक पत्रां दिवप सक्तीचें.
० बायलांक समान पगार आनी आदर.
० एक वर्स नोकरी केले उपरांत थारावीक मुदतीच्या कर्मचाऱ्यांक ग्रेच्युटी.
० 40 वर्सां वयर कामगारांक मुफत वर्सुकी भलायकी तपासणी.
० ओव्हरटायम खातीर दुपेटीन पगार.
० धोकादायक क्षेत्रांतल्या कामगारांक 100% भलायकी सुरक्षा.

ताज्या सुदारणांक लागून कामगारांच्या हक्कांची राखण करतना भारताची अर्थीक वाड घटमूट जातली. ताका लागून रोजगार निर्मिती वाडटली, उत्पादकता वाडटली आनी विकसीत भारता कडेन आमचो प्रवास नेटान जातलो. स्वातंत्र्या उपरांतची ही एक व्यापक आनी प्रगतीशील कामगार केंद्रीत सुदारणा आसून, खास करून बायलांक आनी तरणाट्यांक सार्वत्रिक समाजीक सुरक्षा मेळटा अशें प्रधानमंत्री नरेंद्र मोदी हांणी सांगलें.