भांगरभूंय | प्रतिनिधी
नवी दिल्ली, खबरां संस्था ः देशभरांत कोरोना दुयेंतीचो आंकडो वाडत आशिल्ल्यान नागरिकां मदीं भंयाचें वातावरण निर्माण जाला. केंद्रीय भलायकी मंत्रालयाच्या आंकडेवारी प्रमाण देशभरांत कोविड-19 च्या सक्रीय दुयेंतींचो आंकडो आयज सकाळीं 3 हजार हुंपला. तशेंच फाटल्या 24 वरांत कोविड-19 चे 752 नवें दुयेंती सांपडल्यात जाल्यार 4 जाणांक मरण आयलां.
काल देशांत 640 नवें दुयेंती सांपडले. जाल्यार एकल्याक मरण आयिल्ले. सक्रीय दुयेंती आदले दिस 2,669 आशिल्ले जे 2,997 जाले आनी शेनवारा हो आंकडो 3,420 पावलो. केंद्रीय भलायकी मंत्रालयान शेनवारा सकाळीं 8 वरांचेर अपडेट केल्ल्या आंकडेवारी प्रमाण केरळांत 266, कर्नाटकांत 70, महाराष्ट्रांत 15, तमिळनाडूंत 13 आनी गुजरातांत 12 दुयेंती आसात. वट्ट 17 राज्यांनी कोविड -19 ची सक्रिय प्रकरणा आसात. केरळांत कोविडाक लागून दोन जाणांक मरण आयलां जाल्यार कर्नाटक आनी राजस्थानांत दरेकीं एकल्याक मरण आयलां. बरी खबर म्हळ्यार फाटल्या 24 वरांत कोविड-19 दुयेंसातल्यान 325 जाण बरे जाल्यात.
सध्या कोविड-19 प्रकरणांचो आंकडो हुस्को करपा सारको ना. लोकांक भियेवपाची गरज ना. पूण गंभीर दुयेंसांनी ग्रस्त आशिल्ल्या लोकांक खबरदारी म्हणून फेस मास्क घालपाचो सल्लो केंद्रान दिला. भारतांत कोविडाच्या जेएन.1 वेरिएंटाचे दुयेंती मेळ्ळे तरी तांचीं लक्षणां सामकीं सौम्य आसात असोय उल्लेख केंद्र सरकारान केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
