भांगरभूंय | प्रतिनिधी
नवी दिल्ली, खबरां संस्था: देशांत 1,04,125 शाळांनी फकत एक शिक्षक आसा. थंय 33,76,769 भुरगीं शिकतात. हाचो अर्थ दरेक शाळेंत सरासरी 34 विद्यार्थी आसात. जंय शिक्षणीक हक्क कायद्या प्रमाण मुळाव्या पांवड्यार दर 30 विद्यार्थ्यां खातीर उण्यांत उणो एक शिक्षक आनी उच्च मुळाव्या पांवड्यार दर 35 विद्यार्थ्यां खातीर उणोच एक शिक्षक आसप सक्तीचें आसा.
आंध्र प्रदेशांत अश्यो शाळा सगळ्यांत चड आनी उत्तर प्रदेशांत अशे तरेचे विद्यार्थी सगळ्यांत चड आसात. केंद्रीय शिक्षण मंत्रालयाच्या शिक्षणीक वर्साच्या 2024- 25 वर्साच्या आंकडेवारी प्रमाण 2022 वर्सा 1,18,190 एकल शिक्षक शाळा आनी 2023 वर्सा 1,10,971 शाळा आशिल्ल्यो. हो आंकडो दर वर्सा उणो जायत आसा, पूण शिक्षक- विद्यार्थी गुणोत्तर उच्च आसा.
दरेक शाळेंत सरासरी विद्यार्थ्यांची नोंदणी करपाचे नदरेन चंडीगढ आनी दिल्ली मुखार आसा, दरेक शाळेंत सरासरी अनुक्रमान 1,222 आनी 808 विद्यार्थी आसात, अशें मंत्रालयाच्या एका अधिकार्यान सांगलें. लडाख 59, मिझोराम 70, मेघालय 73 आनी हिमाचल प्रदेशांत 82 विद्यार्थी आसात.
फाटल्या म्हयन्यांत पयलेच खेपे एकाच शिक्षणीक वर्सा देशांतल्या शिक्षकांचो आंकडो एक कोटी पार जालो. ही म्हायती 2024-25 शिक्षणीक वर्सा खातीर युनिफायड डिस्ट्रिक्ट इन्फॉर्मेशन सिस्टम फॉर एज्युकेशन (यूडीआयसीई) अहवालांत उक्ती केल्या. युडीआयसी हो केंद्रीय शिक्षण मंत्रालयाचो डेटाबेस आसा, जाचो हेत सगळ्या शाळांतल्यान शिक्षण संबंदीत म्हायती एकठांय करपाचो आसा.
बायलां शिक्षकांचो आंकडो नेटान वाडलो
ताज्या अहवालांतल्यान दिसून येता की 2023-24 शिक्षणीक वर्सा वट्ट शिक्षकांचो आंकडो 9.883 दशलक्ष आशिल्ली ती 11.24 कोटी जाल्या. तातूंतले 51% (5.147 दशलक्ष) सरकारी शाळांनी आसात. फाटल्या दसकांत बायलां शिक्षकांचोय आंकडो नेटान वाडला.
2014-15 वर्सा 45.46 लाख दादले शिक्षक आनी 40.16 लाख बायल शिक्षक आशिल्ले, जे 2024-25 वर्सा अनुक्रमान 46.41 लाख आनी 54.81 लाख जाले असो अदमास आसा. फाटल्या दशकांत बायल शिक्षकांचो आंकडो सुमार 8 टक्क्यांनी वाडिल्ल्यान तांची भरती जाल्या. 2014 वर्सा सावन 51.36 लाख भरती मदले 61% बायल शिक्षक आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
