भांगरभूंय | प्रतिनिधी
नवी दिल्ली, खबरां संस्था ः दिल्ली- एनसीआरच्या रस्त्यां वयल्यान रस्ताद सुण्यांक काडून आठ दिसां भितर शेल्टरांत धाडपाचे आदेश सर्वोच्च न्यायालयान कांय दिसा आदीं दिल्यात.
रस्ताद सुण्यांच्या चाबण्यांचो आनी भटक्या जनावरांक लागून लोकांक हानी जावपाच्यो घडणूको वाडत आशिल्ल्यान केंद्र सरकारान हुस्को उक्तायला. अशा जनावरांचेर नियंत्रण दवरपा खातीर केंद्रीय गृहनिर्माण आनी शारी वेव्हार मंत्रालय, पंचायती राज मंत्रालय आनी नुस्तेमारी, पशुपालन आनी दुग्धवेवसाय मंत्रालयान मास्टर अॅक्शन प्लॅन तयार केला.
तिनूय मंत्रालयांनी सगल्या राज्यांक एक सल्लागार धाडला. देशांत 1.53 कोटी रस्ताद सुणीं आसात अशें तातूंत म्हणलां. तातूंतल्या 70% सुण्यांचें वर्सा भितर लस दिवन निर्जंतुकीकरण करपाचें ध्येय आसा. ते भायर 2019 वर्साचे पशुजनगणने प्रमाण देशांत 50 लाख रस्ताद जनावरां आसात. रस्ताद सुण्यांच्या चाबण्याची आनी रस्ताद जनावरांक लागून जावपी घडणूकांच्यो हजारांनी कागाळी केंद्राक मेळ्ळे उपरांत तीनूय मंत्रालयांनी हें पावल उबारलां.
रस्ताद सुण्यांक ग्रीन कॉलर टॅग लायतले. हातूंत तांची लस आनी निर्जंतुकीकरणाची म्हायती आसतली. ही म्हायती पशुधन पोर्टलाचेरुय नोंद करची पडटली.
देशांत मणिपूर आनी संवसारांत नेदर्लंड्सांत रस्ताद सुणीं नात
2019 वर्साच्या सरकारी आंकडेवारी प्रमाण, देशांतल्या सगळ्यांत चड सुण्यांचो आंकडो ओडिशा शारांत आसा. जाल्यार लक्षद्वीप- मणिपूरांत एकूय सुणो ना. संवसारांतलो एकमेव देश म्हणल्यार नेदर्लंड्स, जंय रस्त्यार एकूय सुणें दिसचें ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
