भांगरभूंय | प्रतिनिधी
नवी दिल्ली, खबरां संस्था: केंद्र सरकाराच्या भलायकी आनी कल्याण मंत्रालयान बिगर संसर्गजन्य रोग (एनसीडी) देशभरांत खोलायेन चाचणी अभियान सुरू केलां. जनगणने प्रमाण जावपी ही मोहीम ३१ मार्च २०२५ मेरेन चलतली. हे मोहिमेंत ३० वर्सां पिराये वयल्या दादलो-बायलांची तपासणी करतले. ताचेवेल्यान कितले लोक व्याधीग्रस्त आसात वा व्याधी जावपाक शकता, अशा नागरिकांची म्हायती मेळपाक शकतली. हें अभियान आयुष्यमान भलायकी मंदीर(एएएम) आनी देशांतल्या भलायकी केंद्रांनी सुरू उरतलें.
२०२१चे आंकडेवारी प्रमाण देशांतले वट्ट एकूण लोकसंख्येंत ३० वा ते परस चड पिरायेचे ६४% लोक आसात. म्हळ्यार सुमार ८९ कोटी नागरीक हे मोहिमेचो वांटो आसतले. बिगर संसर्गजन्य रोग आनी कॅन्सराच्या तीन प्रकारांचेर (तोंड, ब्रेस्ट आनी गर्भाशय) उपाय करप आनी ते खातीर योग्य ते उपचार निश्चीत करप, हो हे मोहिमेचो हेत. ह्या अभियानाचेर लक्ष दवरतले. तपासणी, उपचार आनी फॉलोअप डेटा सदांच सांजेवेळार ६ वरांचेर मंत्रालयाच्या एनपी-एनसीडी पोर्टलाचेर अपलोड करचो पडटलो.
बिगर संसर्गजन्य रोगां फाटल्यान भारतांत २०१२ ते २०३० ह्या काळांत ३०५ लाख कोटी रुपयांचें अर्थीक लुकसाण जातलें, असो अदमास आसा.
ही तपासणी गरजेची कितल्याक? देशांत ८०% मरण ह्या रोगांक लागूनच! देशांत गोडेंमूत, रक्तदाब आनी कॅन्सराचें प्रमाण नेटान वाडत आसा. संवसारीक भलायकी संघटना आनी भारतीय आयुर्विज्ञान संशोधन परिशद (आयसीएमआर)च्या आकेडवारी प्रमाण देशांत ८०% मरणां बिगर संसर्गजन्य रोगांक लागूनच जातात.
तपासणे खातीर कितें करचें पडटलें?
३० वर्सां परस चड पिरायेचे दादले-बायलो लागसारच्या भलायकी केंद्रांत वचून तपासणी करपाक शकतात. ती फुकट आसतली. आशा, एनएनएम आनी भलायकी सेवक घराघरांनी वतात. उच्च रक्तदाब, गोडेंमत, तोंड, स्तन आनी गर्भाशय कर्करोगा खातीर विवीध चाचणी करतले.
बिगर-संसर्गजन्य रोग म्हळ्यार कितें? बिगर संसर्गजन्य म्हळ्यार एका पसून दुसर्याक जायनात वा संपर्कांतल्यान जायनात. अशे रोग, व्याधी, दुयेंत जावपाक बरोच काळ लागता. मात सुरवातेचीं लक्षणां बेगीन दिसनात. उपचार आयुश्यभर घेवचे लागतात. अशो व्याधी अचकीत मरण आयिल्ल्याचें कारण थारपाक शकतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
