भांगरभूंय | प्रतिनिधी
नवी दिल्ली, खबरां संस्था: देशाचे उत्तरेक सावन ते दक्षीणे मेरेन हवामानाचे स्थितीवर नदर भोंवडायल्यार चडश्या राज्यांनी पावस पाविल्ल्याचें दिसता. तातूंतच नव्यान सक्रीय आशिल्ल्या एका अस्तंत वादळाक लागून दिल्ली, हरियाणांतूय पावसान हाजेरी लायली, तशेंच उत्तरेक आशिल्ल्या राज्यांनीय पावस आनी थंडी अशीं वातावरण दिसून आयलें.
देशभरांत मान्सूनाचो प्रभाव
नैऋत्य मोसमी वारें केरळ मार्गान महाराष्ट्रांत पावला. ह्या वार्याचो परिणाम दिल्ली, बिहार, उत्तर प्रदेश मेरेन दिसता. केरळांत पावसान सगळेच कडेन नेट धरला. दिल्लीक कांय सुवातांचेर उदक सांठून उरपाच्यो घडणुकोय घडल्यात. आयएमडीच्या म्हणण्या प्रमाण सोमारा देशांतल्या ९ राज्यांनी मान्सून दाखल जालो आनी हें मान्सुनाचें वारें थंयच्या थळाव्यांकूय दिसलें.
सध्या मान्सून वार्याचो प्रवास सुरू आशिल्ल्यान देशाच्या चडश्या वाठारांनी पावसान आपली हजेरी लायल्या. जाल्यार, २१ राज्यांनी वादळ, वारें आनी घोग्यांनी पावसाची शिटकावणी जारी केल्या. आश्चर्याची गजाल म्हणल्यार अंदूं मान्सूनाच्या वार्याचो वेग अपेक्षे परस चड आशिल्ल्यान मान्सून २४ मेक केरळांत दाखल जाले उपरांत हें वारें २५ मे मेरेन गोंय, मिझोरम, नागालँड आनी महाराष्ट्र मेरेनूय दाखल जालें.
गोंयांत फुडले ३ दीस उंटगराचो पावस
मजगतीं, हवामान खात्यान दिल्ले म्हायती प्रमाण, फुडले सात दीस गोंयांत पावस कायम उरतलो. तशेंच आयच्यान फुडले ३ दीस उंटगराचो पावस आसतलो. तशेंच ताचे फुडले ४ दीस मध्यम पावस पडपाचो अदमास हवामान खात्यान उक्तायला.
ओडिशा आनी पश्चीम बंगालच्या कांय वाठारांनीय बंगालच्या उपसागरांत निर्माण जाल्ल्या उण्या दाबाच्या पट्ट्याचें परिणाम दिसता, हांगच्या दर्यांत ७ ते १० मजली इमारती इतलीं उंच ल्हारां उसळिल्ल्यान नागरिकां मदीं भंयाचें वातावरण पळोवपाक मेळटा. फुडल्या २४ वरांनी केंद्रीय हवामानशास्त्र विभागान पश्चीम बंगालांत पावसाचो नेट वाडटलो अशी शिटकावणी जारी करीत कर्नाटकाचे शीमेवेल्या वाठारांतूय घोग्यांनी पावसाची शिटकावणी दिल्या. जाल्यार, केरळांतल्या दर्यादेग भागांत दर्या खवदळिल्ल्यान हांगचीं आपात्कालीन यंत्रणांय सतर्क आशिल्ल्याचें पळोवपाक मेळटा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
