भांगरभूंय | प्रतिनिधी
थिवी ते दिवचल भुंयगत वीज केबल घालपाच्या कामाक सुरवात
भांगरभूंय । प्रतिनिधी
दिवचल : गोंयांत वीज सवाय मेळटा. आमचो दर पांच रुपया आसा. हेर राज्यांचे तुळेंत गोंय वीज मळार आदर्श आसा, अशें वीज मंत्री सुदिन ढवळीकार हांणी सांगलें.
33 केव्ही थिवी ते दिवचल भुंयगत वीज केबल घालपाच्या कामाक सुरवात करतना मंत्री ढवळीकार उलयताले. ह्या वेळार आमदार डॉ. चंद्रकांत शेट्ये, आमदार प्रेमेंद्र शेट, नगराध्यक्ष विजय नाटेकार, दीपा पळ, शैलेश बुर्ये, वल्लभ सामंत, वल्लभ साळकार आनी हेर मानेस्त हाजीर आशिल्ले.
फुडल्या 60 वर्सांत वीज पुरवण सुरळीत आनी वेवस्थीत जावची हे खातीर व्हड बदल करतात. सुमार 5 हजार कोटी रुपया खर्च करून कामां चालू आसात. खूबशेंत तंत्रीक बगल घडोवन वीज मळार व्हड परिवर्तन करपाची येवजण प्रधानमंत्री नरेंद्र मोदी, मुख्यमंत्री डॉ. प्रमोद सावंत, केंद्रीय वीज मंत्री हांचें योगदान मेळटा. आणी दरेका मतदारसंघांत 60 कोटी रुपया खर्च करतात. ताका लागून कांय प्रमाणांत वीज वाड अपेक्षीत आसा, अशें मंत्री ढवळीकार हांणी सांगलें.
डॉ. चंद्रकांत शेट्ये हांणी सांगलें, मंत्री ढवळीकार हांणी वीज मळार क्रांतिकारी बदल घडोवन खूबशी सुदारणा केल्या. वीज अधिकारी बरें काम करतात. दिवचले तीन वर्सांत 60 कोटींचीं कामां केल्यांत. दिवचल उपवीज केंद्र अपग्रेड करचे खातीर आनी हेर सुदारणा करचे खातीर 60 कोटी रुपया खर्च जातले.
प्रेमेंद्र शेट हांणी सांगलें, 33 केव्ही वीज केबल दिवचल आनी मयें मतदारसंघा खातीर म्हत्वाची आसा. गोंयभरांत 3 हजार कोटी रुपया खर्च करून भुंयगत वीज केबल घालपाचें काम पुराय जायत आयलां. ही वीज खात्यांत आधुनीक उदरगत आसा आनी तातूंत मंत्री ढवळीकार हांचें व्हड योगदान आसा.
दिवचले वीज आनी हेर उदरगतींत मंत्री आनी आमदार योगदान दितात, अशें विजयकुमार नाटेकार हांणी सांगलें. शैलेश बुर्ये हांणी येवकार दिलो, विश्वास चोडणकार हांणी सुत्रसंचालन केलें जाल्यार वल्लभ सामंत हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
