भांगरभूंय | प्रतिनिधी
पणजीः देशांत लिव्हरा विशींचीं दुयेंसां गंभीर जावन आसात. देशांत फेट्टी लिव्हराच्या दुयेंसाचें प्रमाण 40 टक्के आसा. जाल्यार लिव्हराक जावपी कांक्र हो हेर कांक्राचे तुळेन देशांत पांचवे सुवातेर आसा. देखून लिव्हर निकामी जावपाचें प्रमाण उणें जाता आसत जाल्यार रोखड्या रोखडें ह्या दुयेंसाचेर निदान करप गरजेचें आसा अशें नानावटी मॅक्स होस्पिटलाचे संचालक डॉ. विवेक ताळावलीकार हांणी सांगलें.
मुंबयच्या नानावटी मॅक्स होस्पिटलान गोंयचे दोन दुयेंती ग्रेग फुतार्दो आनी जयेंद्र नायक हांचे लिव्हर निगडीत दुयेंसांचेर उपचार करून येसस्वी लिव्हर ट्रान्सप्लांट सर्जरी केल्या. हे विशींची म्हायती डॉ. विवेक ताळावलीकार आनी डॉ. गौरव चौबाल हांणी पत्रकार परिशदेंत दिली.
आमच्या बदलते जिणेशैलीक लागून फाटल्या कांय वर्सां सावन फेटी लिव्हर दुयेंसांनी वाड जायत आसा अशें डॉ. ताळावलीकार हांणी सांगलें.
देशांत लिव्हर दुयेंसाचें प्रमाण 30 टक्के आसा. तशेंच सोरो पियेवन लिव्हराची दुयेंसां जावपाचें प्रमाण सुमार 22 ते 30 टक्के आसा. जाल्यार फॅटी लिव्हर दुयेंसांत संवसाराची सरासरी 25 टक्के आसा जाल्यार देशाच्या विवीध वाठारांनी ही सरासरी 10 ते 40 टक्के मेरेन आसा. ह्या दुयेंसांचें निदान बेगीन जावचें हे खातीर लोकां मदीं जागृताय करपाची गरज आसा अशी म्हायती डॉ. ताळावलीकार हांणी दिली.
लिव्हराच्या दुयेंसा विशीं उसरां तांचे निदान करप आनी खूब कमी जागृताय हें सदचें जावन उरलां अशें डॉ. चौबाल हांणी सांगलें.
60 टक्के दुयेंती हे लिव्हर दुयेंसाच्या निमाण्या पांवड्यार पावतकच उपचार घेवपाक येतात. जर ते म्हयन्यां पयलीं कांय चांचण्यो करतात जाल्यार ह्या दुयेंसाचें निदान बेगीन करपाक मेळटा. लिव्हर दुयेंसांचें बेगीन निदान, लिव्हर दुयेंसांच्या लक्षणां विशीं लोकां मदीं जागृताय करून त्यो हॉस्पिटलांत गंभीर दुयेंस जावचे पयलींच आमी ताचें निवारण करपाक सोदतात अशी म्हायती चौबाल हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
