भांगरभूंय | प्रतिनिधी
व्हेन्झी व्हिएगशः बाणावले आप कार्यकर्त्यांची केजरीवाल हांचे अटके विरोधांत निदर्शनां
भांगरभूंय । प्रतिनिधी
मडगांवः आम आदमी पक्षाचे (आप) अध्यक्ष तशेंच दिल्लीचे मुख्यमंत्री अरविंद केजरीवाल हांणी उदरगतीच्या कामांचें राजकारण केलें. नसायेंचें राजकार, धर्मीक फुटीच्या राजकारणाक कुशीक दवरलें. राजकारणांतलो हो बदल देशाक आवडला. देशांत बदल हाडप्यांचो भाजपाक भंय दिसता. केजरीवाल हांणी दाखयिल्ल्या उदरगतीच्या कामांचे वाटेर कायम रावतलों, अशें आमदार व्हेन्झी व्हिएगश हांणी सांगलें.
बाणावले आपच्या कार्यालया भायर आपच्या कार्याकर्त्यांनी एकठांय येवन अरविंद केजरीवाल हांकां ईडी वतीन केल्ले अटकेचो निशेध केलो. ह्या वेळार व्हिएगश उलयताले.
देशाच्या इतिहासांत केन्नाच पदार आशिल्ल्या मुख्यमंत्र्याक अटक जावंक नाशिल्ली, पूण तें काम भाजप सरकारान केलां. तातूंत भाजपा केजरीवाल हांकां भियेता, हें दाखोवन दिलां. पूण केजरीवाल हो एक विचार. आपाचे कार्यकर्ते आनी लोकांच्या मनांतलो हो विचार कोणूच काडपाक शकना. सोरो विक्री घोटाळो जाला जाल्यार योग्य तपास करिनासतना मनीष सिसोदिया, सत्येंद्र जैन, विजय नायर आनी आतां केजरीवाल हांकां अटक केली. केजरीवाल हांणी शिक्षण, भलायकी आनी समाजक उदरगतींत बदल हाडलो, राजकारणाच्या व्याख्या बदल्ली. केजरीवाल हांणी दिल्ले विचार गोंयांतूच न्हय जाल्यार देशभरांत पातळ्ळ्यात. देशभरांत केजरीवाल निर्माण जाल्यात. केजरीवाल हांचे अटकेचो निशेध करीत गोंय आनी गोंयकाराचे उदरगती खातीर काम करतलों, अशें आमदार व्हिएगश हांणी सांगलें.
विरोधी पक्षाच्या फुडाऱ्याक अटक करून भाजपाचें सरकार राजकारणांत नव्यान येवपी आनी बदल घडोवपाक सोदपी तरणाट्यांक भेश्टावपाचो यत्न करता. पूण गोंयांतले लोक भाजपा विरोधांत मतदान करून हे दडपशायेक जाप दितले. भाजपा सरकारा कडल्यान सरकारा आड उलोवप्यांक, चुकीच्यो गजाली दाखोवप्यांक बंदखणींत घालपाचें धोरण आपणायलां. धर्मा धर्मांमदीं फूट घालून मतांची झोळी भरपाचें काम भाजप करता. लोकांमदीं फूट घालून देश चलोवपाचो आनी हुकूमशाय हाडपाचो प्रकार भाजपा कडल्यान चालू आसा. आतां फुडाऱ्यांक आनी हे फुडें लोकांक लेगीत बंदखणींत घालपाचे प्रकार जातले. ताका लागून वेळारूच सादूर जावन लोकांनी निर्णय घेवपाची गरज आसा, अशें व्हिएगश हांणी सांगलें. भाजप भायल्यान जिखपाचें सवंग घेता तरी भितरल्यान भियेला. देशांतल्या विरोधकांचो आवाज चेपपाचो हो प्रकार आणिबाणीचोच प्रकार आसा. ईडी, सीबीआय वा हेर एजन्सी फक्त विरोधकांकूच कित्याक लक्ष्य करता, हें लोकांक आतां कळपाक लागलां. ते खातीर लोकांनी जागृत जावन मतदान करपाची गरज आसा. गुन्यांवकाराक अटक करपाक सांगली जाल्यार ताका लेगीत पुराव्यांची गरज आसता, पूण ईडी, सीबीआयचो वापर करून केंद्रांतलें भाजप सरकार विरोधकांक बंदखणींत उडयत लोकशायेंत दडपशायेचो नवो पायंडो घालता, अशीं मतां हाजीर आशिल्ल्या लोकांनी उक्तायलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
