भांगरभूंय | प्रतिनिधी
हिमाचलांत २१३ रस्ते बंद: १००४ कोटी रुपयांचें लुकसाण; वाराणसींतले ५० घांट गंगेंत
नवी दिल्ली, खबरां संस्था: बिहारांत उटंगाराच्या पावसाक लागून गंगा, गंडक आनी कोसी न्हंयांक हुंवार आयला. न्हंयांच्या कांठार वशिल्ल्या जायत्या वाठरांनी धोको आसा. बांका हांगा मंगळारा रातीं वीज पडून तिगांक मरण आयलें.
उत्तर प्रदेशांतय व्हड पावसाक लागून १५ जिल्ह्यांनी हुंवार आयला. वाराणसींतले ५० घांट गंगेंत बुडल्यात. हांगा एनडीआरएफ तैनात केल्यात. कानपूरांत गंगेन धोक्याची पातळी हुंपल्या.
हिमाचल प्रदेशांत पावस आनी पालसणां कोसळिल्ल्यान २१३ रस्ते बंद आसात. हवामान खात्यान बुधवारा देशांतल्या २२ राज्यांनी घोग्यांनी पावस पडपाची शिटकावणी दिल्या. खुबश्या राज्यांनी वीज पडपाची शिटकावणीय दिल्या.
राजस्थान, मध्य प्रदेशांत ३ दिसांनी २८ मरणां
राजस्थानाच्या करौलींत हुंवारा सारकी परिस्थती आसा. राज्यांत हुंवाराच्या पावसाक लागून ३ दिसांनी २८ जाणांक मरण आयलें. दौसा जिल्ह्यांतल्या सरकारी आनी खाजगी शाळांनी १४ ऑगस्टाक (बुधवार) सुटी जाहीर केल्या.
हिमाचलांत १००४ कोटी रुपयांचें लुकसाण
ह्या पावसांत हिमाचलांत घोग्यांनी पावस आनी खुबश्या सुवातांचेर पालसणां पडपाच्यो घडणुको घडल्यो. राज्यांत पावसाक लागून २७ जुलय ते १२ ऑगस्ट मेरेन १००४ कोटी रुपयांचें लुकसाण जालां. राज्याच्या आपत्कालीन विभागान सांगलें, पावसा कडेन संबंदीत घडणुकांक लागून ११० जाणांक आपलो जीव वगडावचो पडलो.
१५ ऑगस्टाक १६ राज्यांनी उटंगाराच्या पावसाची शिटकावणी
-हवामान खात्याच्या म्हणण्या प्रमाण, १५ ऑगस्टाक दक्षीणेक कर्नाटक आनी केरळांत घोग्यांनी पावसाची शिटकावणी आसा.
-अरुणाचल प्रदेश, सिक्कीम, झारखंड, आसाम, मेघालय, नागालँड, मणिपूर, मिझोराम, त्रिपुरा, ओडिशा, बिहार, पश्चिम बंगाल, उत्तराखंड, उत्तर प्रदेश, जम्मू, हरियाणा आनी छत्तीसगडांत घोग्यांनी पावस पडपाची शिटकावणी दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
