भांगरभूंय | प्रतिनिधी
नवी दिल्ली, खबरां संस्थां: देशांत पयलेच खेपे शिक्षणीक सत्रांत शिक्षकांचो आंकडो एक कोटी हुंपला. पूण देशभरांत १,०४,१२५ शाळा आसात, जंय फकत एक शिक्षक आसा. तशेंच ७९९३ शाळांनी विद्यार्थी नोंदणी करूंक नात, म्हणल्यार थंय कोणूच शिकना. पूण फाटल्या सत्राचे तुळेंत हे दोनूय आंकडे उणे जाल्यात.
हे आंकडे २०२४-२५ वर्साच्या शिक्षणीक सत्रा खातीर युनिफायड डिस्ट्रिक्ट इन्फॉर्मेशन सिस्टम फॉर एज्युकेशन (यूडीआयसीई) च्या अहवालांत उजवाडाक आयल्यात. युडीआयसीई हो केंद्रीय शिक्षण मंत्रालयाचो डेटाबेस आसा, जाचो हेत सगळ्या शाळांतल्यान शिक्षणा संबंदी म्हायती एकठांय करपाचो आसा.
बायलां शिक्षकांचो आंकडो वाडला
ताज्या अहवाला प्रमाण २०२३-२४ वर्साच्या सत्रांत वट्ट शिक्षकांचो आंकडो ९८.८३ लाख आशिल्ली, ती आतां वाडून १ कोटी १ लाख २२ हजार ४२० जाल्या, तातूंतले ५१% (५१.४७ लाख) शिक्षक सरकारी शाळांनी आसात. फाटल्या दसकांत बायलां शिक्षकांचोय आंकडो नेटान वाडला.
२०१४-१५ वर्सा ४५.४६ लाख दादले शिक्षक आनी ४०.१६ लाख बायल शिक्षक आशिल्लीं, जीं २०२४-२५ वर्साच्या अनुक्रमान ४६.४१ लाख आनी ५४.८१ लाख मेरेन वाडलां. फाटल्या दशकांत बायल शिक्षकांचो आंकडो सुमार ८ टक्क्यांनी वाडपाचें मुखेल कारण म्हणल्यार तांची भरती. २०१४ वर्सा सावन ५१.३६ लाख भरती जाल्ल्यां मदलीं ६१% बायल शिक्षक आसात
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
