भांगरभूंय | प्रतिनिधी
खाजगी शाळांनी संख्या 20 टक्क्यांनी वाडलीः युडीआयएसई प्लसची आंकडेवारी
नवी दिल्ली, खबरां संस्था ः पयलेच खेपे देशांतल्या सगळ्या शाळांनी बायलां शिक्षकांचो आंकडो दादल्यां परस चड म्हळ्यार 53.3% इतलो आसा. सध्या देशांतल्या 14.72 लाख शाळांनी वट्ट 98 लाख शिक्षक आसात, तातूंतले 52.3 लाख बायलां शिक्षक आसात. 2018-19 वर्सां हो आंकडो 47.14 लाख आशिल्लो. तेन्ना सावन शाळांनी बायलां शिक्षकांचो आंकडो स्थिरपणान वाडत आसा.
युनिफायड डिस्ट्रिक्ट इन्फॉर्मेशन सिस्टम फॉर एज्युकेशन प्लस म्हळ्यार UDISE+ च्या 2023-24 वर्सांच्या अहवालांतल्यान ही आंकडेवारी मेळ्ळां.
5 वर्सांत बायलां शिक्षकांचो आंकडो 3.3% वाडलो…
2018-19 वर्सां दादले शिक्षकांचो आंकडो 50% आशिल्लो. वट्ट 94.3 लाख शाळा शिक्षकां मदीं 47.16 लाख शिक्षक दादले आशिल्ले. तातूंतले 47.14 लाख म्हळ्यार 49.98% बायलां शिक्षिक आशिल्ल्यो. 2023-24 वर्सा बायलां शिक्षिकांचो आंकडो वाडून 52 लाख जालो, जाल्यार दादल्या शिक्षकांचो आंकडो उणो जावन 45.7 लाख जालो.
टक्केवारी प्रमाण बायल शिक्षिकांचो वांटो 3.3% वाडून 53.3% जालो, जाल्यार दादल्या शिक्षकांचो वांटो 3% वयल्यान 46.6% जालो.
2019-20 वर्सां बायलां शिक्षकांनी पयलेच खेपे 50% आंकडो हुपलो. हाचे उपरांत 2022-23 वर्सां बायलां शिक्षकांचो वांटो 51.3% आशिल्लो तो 52.3% आनी 2023-24 वर्सां 53.3% इतलो जालो.
खाजगी शाळांनी बायलां शिक्षिकां 20%, सरकारी शाळांनी फकत 6%…
सरकारी शाळां बदला खाजगी शाळांनी बायलां शिक्षकांचो आंकडो वाडत आसा हें युडीआयएसई प्लसाच्या अहवालांतल्यान स्पश्ट जाता. फाटलीं पांच वर्सां सरकारी शाळांनी दादल्यांचो आंकडो चड आसा.
2018-19 वर्सां 49.47 लाख सरकारी शाळांतल्या शिक्षकांतले 28.18 लाख म्हळ्यार 57% दादले आनी 21.29 लाख म्हळ्यार 43% बायलां शिक्षक आशिल्ले. सरकारी शाळांनी बायलां शिक्षकांचो आंकडो सुमार 6 टक्क्यांनी वाडून 2023-24 वर्सा 22.65 लाख जालो. जाल्यार दादले शिक्षकांची संख्या 27.72 लाख आसा.
जाल्यार खाजगी शाळांनी फाटल्या 5 वर्सां सावन दादल्या शिक्षकां परस बायलां शिक्षकांचो आंकडो चड आसा. सुमार 20% वाड जाल्या. 2023-24 वर्सा वट्ट 37.30 लाख खाजगी शाळा शिक्षकांतले 66% म्हळ्यार सुमार 24.76 लाख बायल शिक्षक आसात. जाल्यार 2018-19 वर्सा वट्ट 33.04 लाख खाजगी शाळा शिक्षकांतले 20.63 लाख बायल शिक्षक आशिल्ले.
पूण केरळ, तमिळनाडू आनी पंजाब ह्या राज्यांतल्या सरकारी शाळांनी लेगीत दादल्या शिक्षकां परस बायलां शिक्षिका चड आसात. देखीक केरळांतल्या सरकारी शाळांनी 78% शिक्षक बायलां आसात. जाल्यार तमिळनाडूंत 67%, पंजाबांत 64% आनी दिल्लीच्या सरकारी शाळांनी 61% शिक्षिक बायलां आसात.
उच्च शिक्षणांत 15% चड दादले शिक्षक
पूण हे शालेय शिक्षणाचे आंकडे आसात. उच्च शिक्षण घेतिल्ल्या दादल्यांचो आंकडो बायलांपरस चड आसा. अखिल भारतीय उच्च शिक्षण सर्वेक्षणाच्या (AISHE) 2021-22 वर्साच्या आंकडेवारी प्रमाण उच्च शिक्षणांत बायलां शिक्षकांचें प्रमाण फकत 43% आसा, जाल्यार 57% दादले शिक्षक आसात. 2018-19 वर्सा हो उच्च शिक्षणांत दादले शिक्षक 58% आनी बायलां शिक्षक 42% आशिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
