भांगरभूंय | प्रतिनिधी
भारतीय अन्न सुरक्षा आनी मानक प्राधिकरणा कडल्यान 766 जिल्हांनी तपासणी सुरु
नवी दिल्ली, खबरां संस्था ः भारतीय अन्न सुरक्षा आनी मानक प्राधिकरणान देशभरांतल्या 766 जिल्ह्यांनी दुदाची आनी दुदाच्या पदार्थांची तपासणी सुरू केल्या. भलायके खातीर म्हत्वाचें आशिल्ल्या ह्या अन्न पदार्थांत भेसळ जावची न्हय हे खातीर ह्या म्हयन्या सावन हें सर्वेक्षण सुरू केल्ल्याची म्हायती ‘एफएसएसएआय’च्या अधिकाऱ्यांनी सोमारा दिली. देशांत विकपाक येवपी दूद आनी दुदाचे पदार्थ अन्न सुरक्षा आनी मानक नेमांक पाळो दितात काय नात हाचें मुल्यांकन करपा खातीर ही येवजण सुरु केल्या. तशेंच खंयच्या वाठारांत चड भरसण जाल्या तें पळयतले. उपरांत दुरुस्ती कारवाय धोरणा तयार करतले.
ऑक्टोबर मेरेन हें सर्वेक्षण चालू उरतलें आनी ताचो अहवाल डिसेंबरांत भलायकी मंत्रालयाक सादर करतले अशें एफएसएसएआयचे सल्लागार सत्येन के पांडा हांणी सांगलें. देशांतल्या 766 जिल्ह्यांनी 10 हजारां परस चड नमुने एकठांय करतले. वाणिज्य आनी उद्देग मंत्रालयाच्या खाला ‘भारतीय गुणवत्ता परिशद’ आनी ‘राष्ट्रीय दुग्ध विकास मंडळ’ ह्यो दोन संस्थां कामाक लागल्यात अशी म्हायती पांडान दिली.
ह्या सर्वेक्षणांत दूद, खवो, छेना, पनीर, तूप, लोणी, धंय आनी आइसक्रीम ह्या पदार्थांची तपासणी जातली. तांची भेसळ, सामान्य दर्जो आनी घटकां प्रमाण प्ररामूल्य (पॅरामीटर्स), दूषित पदार्थ, प्रतिजैव अवशेश आनी सूक्ष्मजीवशास्त्रीय निर्देशकां खातीर चांचणी जातली. दुदाची आनी दुदाच्या उत्पादनांची तपासणी करपा खातीर एफएसएसआयएन 2011 वर्सा सावन देशभरांत पांच सर्वेक्षणां केल्यांत.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
