भांगरभूंय | प्रतिनिधी
अर्जून चौगुले: गोंयांत सागर मंडळाची स्थापणूक करची
पणजी: पुराय देशांत वेवसायीक बोट बांदणी मळार गोंय मुखार आसा. देशांतल्या वट्ट बोट बांदणी वेवसायांत गोंयचो वांटो 40 टक्के आसा. गोंयांतल्या बोट बांदणी उद्देगांत वाड जावपा खातीर सरकारान प्रोत्साहन दिवप गरजेचें आसा. हे खातीर गोंय राज्य सागरी मंडळाची स्थापणूक करची अशी मागणी सीआयआय गोंय विभागाचे अध्यक्ष अर्जून चौगुले हांणी केली. शुक्रारा पणजेंत जाल्ले पत्रकार परिशदेंत ते उलयताले. ह्या वेळार प्रसाद सावंत हाजीर आशिल्ले.
चौगुले हांणी सांगलें, गोंयच्या बोट बांदणी उद्देगांत व्हड तांक आसा. सप्टेंबर 2025 अखेरेक ह्या उद्देगाचें मुल्य सुमार 2865 कोटी रुपया आशिल्लें. 2037 मेरेन तें वाडून 64 हजार कोटी मेरेन पावूंक शकता. हाका लागून गोंयांत 3 हजार प्रत्यक्ष, 18 हजार अप्रत्यक्ष रोजगार उपलब्ध जावंक शकतात. ह्या उद्देगाक प्रोत्साहन दिवपा खातीर गोंयांत सागरी मंडळ आसप गरजेचें आसा. देशाच्या हेर दर्यादेग राज्यांनी अशीं मंडळां कार्यरत आसात. हे वरवीं उद्देगाक लागपी परवाने सहजतायेन उपलब्ध करून दिवंक मेळटले. अशें जायत जाल्यार हे प्रक्रियेंत पारदर्शकताय येतली अशें तांणी सांगलें.
गोंयच्या बोट बांदणी उद्देगा विशीं सीआयआयन व्हिजन डॉक्युमेंट तयार केलां. हातूंत म्हत्वाच्यो शिफारसी केल्यात. हातूंत मांडवी आनी जुवारी न्हंयेंतलो गाळ उसपुवप, हरीत बोट बांदणी पार्क उबारप, गोंयांत सागरी तंत्रज्ञान आनी डिझायन संस्था उबारप, पुरवण सांखळी सुदारप, हरीत बोट बांदणे खातीर अनुदान दिवप, शिपयार्डा मेरेन येरादारी करपी रस्ते, उदका मार्ग, रेल्वे मार्ग सुदारप, कंटेनर टर्मिनल तयार करपा खातीर गोंयांतल्या न्हंयांचो अभ्यास करप अश्यो विवीध शिफारशी केल्ल्याचें चौगुले हांणी सांगलें.
पदवी अभ्यासक्रम सुरू करचो
गोंयच्या बोट बांदणी उद्देगाक कुशळ मनीसबळाची गरज आसा. हे खातीर गोंयांत नेव्हल आर्किटेक्ट तशेंच बोट बांदणी तंत्रज्ञान ह्या विशयांचें पदवी अभ्यासक्रम सुरू करप गरजेचें आसा. हाका लागून गोंयच्या विद्यार्थ्यांक ह्या मळार आधुनीक ज्ञान मेळपाक मजत जावन तांचो कुशळटाय विकास लेगीत जातलो अशें अर्जून चौगुले हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
