भांगरभूंय | प्रतिनिधी
नवी दिल्ली, खबरां संस्था : देशांत खादी आनी हातमागाच्या कपड्यांची विक्री वाडिल्ल्याचें प्रधानमंत्री नरेंद्र मोदी हांणी आयतारा ‘मन की बात’ कार्यावळींत सांगलें. हाका लागून देशांत रोजगाराच्यो संदी वाडटा असो विस्वास तांणी उक्तायलो. तशेंच, खादी ग्रामोद्येगाच्या वेवसायान पयलेच फावट १.५ लाख कोटींचो टप्पो हुपला अशी म्हायती प्रधानमंत्र्यांनी दिली.
दर म्हयन्याच्या निमाण्या आयतारा आकाशवाणी वयल्यान प्रसारीत जावपी ‘मन की बात’ हे कार्यावळींत मोदी हांणी खादी संबंदी आपलीं मतां मांडलीं. तांणी, ‘‘ह्यान पयलीं जे लोक खादी वापरपाक इत्सूक नाशिल्ले ते आतां अभिमानान हीं उत्पादनां वापरतात. खादी ग्रामोद्देगाच्या वेवसायान पयलेच फावट १.५ लाख कोटींचा टप्पो हुपला. खादीची विक्री कितली वाडल्या हें तुमकां खबर आसा? चारशें टक्के! वाडपी विक्रेक लागून व्हडा प्रमाणांत रोजगाराची नवी संद वाडटा. ह्या उद्देगांत चडश्यो बायलो आशिल्ल्यान तांकां सगळ्यांत चड फायदो जाता.’’
ह्या वेळार मोदी हांणी ऑलिम्पिकांत भारतीय संघ, गणित ऑलिम्पियाडांत भारताक मेळिल्लें येस, आसामांतल्या ‘मोइदाम’चो युनेस्कोच्या संवसारीक दायजांत जाल्लो आसपाव अश्या विवीध मुद्द्यांचेर मत उक्तायलें. तशेंच तरणाट्यां मदीं घुवळे वखदां घेवपाचें प्रमाण वाडिल्ल्यान प्रधानमंत्र्यांनी हुस्को उक्तायला. ताका लागून पालकां मदीं काळजीचें प्रमाण वाडलां. अशा कुटुंबांक मजत करपा खातीर ‘१९९३’ ही टोल-फ्री हेल्पलायन सुरू केल्ल्याचें तांणी सांगलें. घुवळे वखदां आड घेतिल्लें हें व्हड पावल अशें प्रधानमंत्री मोदी हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
