भांगरभूंय | प्रतिनिधी
नवी दिल्ली, खबरां संस्थाः देशांत खरीफ पेरणींत पोरुंच्या तुळेंत 38.48 टक्क्यांनी वाड जाल्या. भाताच्या पिकाचे लागवडींत सगळ्यांत चड वाड जाल्या. ते उपरांत मको आनी ऊंस हांची लागवडय वाडत आसा. पूण केंद्र सरकारान राष्ट्रीय खाद्य तेल मिशन चालीक लायले उपरांत लेगीत तेलबियांची लागवड मात सात टक्क्यांनी उणी जाल्या.
देशांत खरीफ हंगामाचे सरासरी क्षेत्रफळ 1096.65 लाख हेक्टर आसा. पोरुं 957.15 लाख हेक्टर जमनींत पेरणी जाल्ली. जाल्यार अंदूंच्या खरीफ हंगामांत 11 ऑगस्ट मेरेन 995.63 लाख हेक्टर वाठारांत पेरणी जाल्या. पोरुंच्या तुळेंत भाताची लागवड सगळ्यांत चड 39.45 टक्क्यांनी वाड जावन 364.80 लाख हेक्टर जाल्या.
केंद्र सरकारान कड्ड्ण लागवड करपाक प्रोत्साहन दिलें तरी दाळांचे लागवडींत वाड जावंक ना. वट्ट 106.68 लाख हेक्टर वाठारांत कड्ड्णांची लागवड जाल्या. तातूंत तुर 40.86 लाख हेक्टर, कुळीथ 17 हजार हेक्टर, उडीद 20.15 लाख हेक्टर, मूंग 33.21 लाख हेक्टर, मटकी 9.06 लाख हेक्टर आनी हेर कड्ड्णांची 3.24 लाख हेक्टर वाठारांत लागवड जाल्या. ऊंसाची लागवड 1.64 टक्क्यांनी वाडल्या आनी 57.31 लाख हेक्टर वाठारांत ताची लागवड जाल्या. कापसाची लागवडय 3.53 टक्क्यांनी उणी जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
